ماڭعىستاۋ وبلىسىنداعى بەكەت اتا، شوپان اتا، قارامان اتا، شاقپاق اتا جانە سۇلتان ءۇپى جارتاستى مەشىتتەرى يۋنەسكو-نىڭ دۇنيەجۇزىلىك مۇرالار تىزىمىنە ەنگىزىلدى، دەپ حابارلايدى "ادىرنا" ءتىلشىسى.
بۇل تۋرالى پرەزيدەنت اكىمشىلىگى باسشىسىنىڭ ءبىرىنشى ورىنباسارى ەرلان قارين حابارلادى.
ونىڭ ايتۋىنشا، ءتيىستى شەشىم كورەيا رەسپۋبليكاسىنىڭ پۋسان قالاسىندا ءوتىپ جاتقان يۋنەسكو دۇنيەجۇزىلىك مۇرالار كوميتەتىنىڭ 48-ءشى سەسسياسىندا قابىلدانعان. ەرلان قارين بۇل جەتىستىك مەملەكەت باسشىسى قاسىم-جومارت توقاەۆتىڭ باستاماسى مەن تىكەلەي قولداۋىنىڭ ناتيجەسىندە جۇزەگە اسقانىن اتاپ ءوتتى.
پرەزيدەنت قاسىم-جومارت توقاەۆ 2024 جىلى ۇلتتىق قۇرىلتايدىڭ اتىراۋدا وتكەن ءۇشىنشى وتىرىسىندا ماڭعىستاۋدىڭ جارتاستى مەشىتتەرىن يۋنەسكو مۇرالارى تىزىمىنە ەنگىزۋ جۇمىستارىن باستاۋدى تاپسىرعان. يۋنەسكو بۇل نىسانداردى كوپعاسىرلىق رۋحاني، مادەني جانە ساۋلەت داستۇرلەرىنىڭ كورنەكتى ۇلگىسى رەتىندە مويىنداعان.
پرەزيدەنت اكىمشىلىگى باسشىسىنىڭ ءبىرىنشى ورىنباسارى ەرلان قاريننىڭ سوزىنشە، الداعى ۋاقىتتا جاركەنت مەشىتىن، الماتىداعى ۆوزنەسەنسك كافەدرالدى شىركەۋىن، قاراتاۋ پەتروگليفتەرىن جانە اباي قۇنانبايۇلىنىڭ «قارا سوزدەرىن» يۋنەسكو تىزىمدەرىنە ەنگىزۋ باعىتىنداعى جۇمىستار جالعاساتىنىن جەتكىزدى.
