قازاقستان پرەزيدەنتى قاسىم-جومارت توقاەۆ قازاقستان حالىق كەڭەسىنىڭ قۇرامىن بەكىتتى، دەپ حابارلايدى "ادىرنا" ۇلتتىق پورتالى.
جاڭا كونسۋلتاتيۆتىك ورگانعا بارلىعى 126 ادام ەندى. بۇل تۋرالى اقوردا حابارلادى.
پرەزيدەنت قاسىم-جومارت توقاەۆ قازاقستان حالىق كەڭەسىنىڭ قۇرامىن بەكىتۋ تۋرالى №1474 جارلىققا 22 قىركۇيەكتە استانادا قول قويدى. قۇجات سول كۇنى كۇشىنە ەندى.
قازاقستان حالىق كەڭەسىنىڭ قۇرامىنا وڭىرلەردەن، قوعامدىق جانە ەتنومادەني بىرلەستىكتەردەن، قورلاردان، كاسىپوداقتاردان، بۇقارالىق اقپارات قۇرالدارى، عىلىم، ءبىلىم، سپورت جانە بيزنەس سالالارىنان وكىلدەر كىردى.
كەڭەس قۇرامىندا قازاق ءتىلىن دامىتۋ مەن ونىڭ قوعامدىق قولدانىسىن كەڭەيتۋ باعىتىندا ەڭبەك ەتىپ جۇرگەن ازاماتتار دا بار. ولاردىڭ قاتارىندا سەنات دەپۋتاتى نۇرتورە ءجۇسىپ، قوعام قايراتكەرى ەرمۇرات ءباپي جانە «قازاق ءتىلى» حالىقارالىق قوعامىنىڭ پرەزيدەنتى راۋان كەنجەحانۇلى بار. راۋان كەنجەحانۇلى بۇعان دەيىن كونستيتۋتسيالىق رەفورما جونىندەگى كوميسسيا قۇرامىندا دا بولعان.
سونداي-اق قازاقستان حالىق كەڭەسىنىڭ قۇرامىنا «قازاقتەلەكوم» باسقارما توراعاسى باعدات مۋسين، قازاق ۇلتتىق مەديتسينا ۋنيۆەرسيتەتىنىڭ ءبىرىنشى پرورەكتورى ديليارا قايداروۆا، رەسپۋبليكالىق ادۆوكاتتار القاسىنىڭ توراعاسى ءمادي مىرزاعاراەۆ، وليمپيادا چەمپيونى يۋري مەلنيچەنكو جانە قازاقستان بوكس فەدەراتسياسىنىڭ پرەزيدەنتى شاحمۇرات مۋتاليپ ەنگىزىلدى.
بۇدان بولەك، جاڭا ورگان قۇرامىندا جۋرناليستەر، دارىگەرلەر، وقىتۋشىلار، ەكولوگتار، ۆولونتەرلەر، ۇلتتىق سپورت فەدەراتسيالارى مەن قوعامدىق ۇيىمداردىڭ وكىلدەرى بار.
قازاقستان حالىق كەڭەسى – قازاقستان حالقىنىڭ مۇددەسىن بىلدىرەتىن جوعارى كونسۋلتاتيۆتىك ورگان. ونىڭ نەگىزگى مىندەتتەرىنىڭ ءبىرى – ىشكى ساياساتتىڭ نەگىزگى باعىتتارى، قوعامدىق كەلىسىم، جالپىۇلتتىق بىرلىك پەن ىنتىماقتى نىعايتۋ ماسەلەلەرى بويىنشا ۇسىنىستار ازىرلەۋ. بۇل نورما جاڭا كونستيتۋتسيانىڭ 70–71-باپتارىندا بەكىتىلگەن.
