نۇر-سۇلتان قالاسى ەسىل اۋداندىق سوتىنىڭ سۋدياسى قانات دۇيسەمبيەۆ «سك-فارماتسيا» جشس-ءنىڭ بۇرىنعى باسشىسى بەرىك شارىپكە قاتىستى ۇكىم شىعاردى، دەپ حابارلايدى "ادىرنا" ءتىلشىسى.
سۋديا ۇكىمدى وقىدى، وعان سايكەس ب.شارىپكە قارۋدى زاڭسىز ساقتاعانى ءۇشىن ايىپپۇل سالىندى، ال دارىگەرلەرگە اۋرۋ جۇقتىردى دەگەن ايىبىنان اقتالدى.
بەرىك ءشارىپ باپ بويىنشا قىلمىستىق قۇقىق بۇزۋشىلىق جاساعانى ءۇشىن قازاقستان رەسپۋبليكاسىنىڭ قىلمىستىق كودەكسىنىڭ 287 ب. 2 بولىگى بويىنشا كىنالى دەپ تانىلدى جانە وعان 2 ميلليون 778 مىڭ تەڭگە سوماسىندا 1000 اەك مولشەرىندە ايىپپۇل سالىندى. بەرىك ءشارىپ قر قك 361 ب. 4 ب. 3 ت. بويىنشا قىلمىستىق قۇقىق بۇزۋشىلىق جاساماعانى ناقتىلانىپ، كىنالى ەمەس دەپ تانىلدى جانە ونىڭ ءىس -ارەكەتىندە قىلمىستىق قۇقىق بۇزۋشىلىق بولماعانى انىقتالىپ، اقتالدى. بەرىك شارىپكە تاعايىندالعان جازا وتەلدى دەپ ەسەپتەلسىن جانە ول سوت وتىرىسى كۇزەتىنەن بوساتىلسىن. قاماۋدا ۇستاۋ تۇرىندەگى بۇلتارتپاۋ شاراسىنىڭ كۇشى جويىلۋعا ءتيىس. قىلمىستىق جاۋاپكەرشىلىككە تارتۋ ارقىلى زاڭمەن كەلتىرىلگەن زياننىڭ ورنى تولتىرىلسىن - دەدى سۋديا قانات دۇيسەمبيەۆ.
بەرىك ءشارىپتى 2020 جىلدىڭ 14 تامىزىندا سىبايلاس جەمقورلىققا قارسى قىزمەت قىزمەتكەرلەرى ۇستاپ، نۇر-سۇلتان پد ۋاقىتشا ۇستاۋ يزولياتورىنا قامادى. ول 2020 جىلدىڭ 21 ساۋىرىنەن باستاپ تەگىن مەديتسينالىق كومەك كولەمىن قامتاماسىز ەتۋ ءۇشىن ءدارى -دارمەك پەن مەديتسينالىق ماقساتتاعى بۇيىمداردى ساتىپ الۋ جونىندەگى ديستريبيۋتورلىق كومپانيانى باسقاردى. 2020 جىلدىڭ 10 شىلدەسىندە ول ەل پرەزيدەنتى قاسىم-جومارت توقاەۆتىڭ سىنىنان كەيىن قىزمەتىنەن بوساتىلدى.
سك-فارماتسيانىڭ بۇرىنعى باسشىسىنىڭ ءىسى «قىزمەتتىك وكىلەتتىكتى اسىرا پايدالانۋ» جانە «قارۋدى، وق-دارىلەردى، جارىلعىش زاتتار مەن جارىلعىش قۇرىلعىلاردى زاڭسىز الۋ، بەرۋ، ساتۋ، ساقتاۋ، تاسىمالداۋ نەمەسە الىپ ءجۇرۋ» باپتارى بويىنشا قارالدى. اتاپ ايتقاندا، بۇرىنعى جشس باسشىسى 2020 جىلدىڭ ءساۋىر-مامىرىندا ساپاسىز قورعانىس كوستيۋمدەرى مەن زاڭسىز ساقتالعان قارۋدى ساتىپ الۋ سالدارىنان دارىگەرلەرگە جاپپاي كوروناۆيرۋس ينفەكتسياسىن جۇقتىردى دەپ ايىپتالدى.
سوڭعى سوزىندە ءشارىپ ءوزىنىڭ كىناسىن مويىندامايتىنىن قايتالادى.
بۇعان دەيىن پروكۋرور بەرىك شارىپكە بەس جىل باس بوستاندىعىنان ايىرۋدى ورتاشا رەجيمدەگى كولونيادا وتەۋدى سۇراعان بولاتىن.
"ادىرنا" ۇلتتىق پورتالى
