"ناۋرىزباي قاجى تاعانۇلى قاسىم-جومارت توقاەۆقا قازاقستان مۇسىلماندارى ءدىني باسقارماسىنىڭ جەتى باعىت بويىنشا بيىلعى اتقارىپ جاتقان جۇمىستارى جانە الداعى جوسپارى تۋرالى باياندادى.
مەملەكەت باسشىسىنا قازاقستان مۇسىلماندارى ءدىني باسقارماسىنىڭ پاندەميا كەزىندە ورازانىڭ ۇيىمداستىرىلۋ ەرەكشەلىكتەرى، جاساپ جاتقان قايىرىمدىلىق شارالارى جايىندا مالىمەت بەرىلدى. سونىمەن قاتار ەلوردادا يسلام اكادەمياسىن قۇرۋ جۇمىستارىنىڭ باستالعانى تۋرالى ايتىلدى.
قاسىم-جومارت توقاەۆ قازاقستان مۇسىلماندارىن قاسيەتتى رامازان ايىنىڭ باستالۋىمەن قۇتتىقتاپ، بۇكىل الەم باستان وتكەرىپ وتىرعان پاندەميا كەزىندە جاماعاتتى سابىرعا شاقىرىپ، ەپيدەميولوگيالىق جاعدايدىڭ تۇراقتالاتىنىنا، مەشىتتەردىڭ تولىق اشىلاتىن كۇنى الىس ەمەس ەكەنىنە سەنىم ءبىلدىردى.
قمدب توراعاسى، باس ءمۇفتي پرەزيدەنتتى رامازان ايىنىڭ العاشقى كۇنىمەن قۇتتىقتاپ، «مۋفتيات» باسپاسىنان جاقىندا جارىق كورگەن «تاپسىرلەردىڭ تاڭداۋلىسى» اتتى قۇران تاپسىرلەرىنىڭ قازاق جانە ورىس تىلدەرىندەگى 8 تومدىق اۋدارماسىن تابىستادى" دەپ جازدى اقوردا.
"ادىرنا" ۇلتتىق پورتالى
