قازاقستاندا ۇلتتىق ءبىلىم بەرۋ دەرەكتەر بازاسى جاڭعىرتىلىپ، ونىڭ نەگىزىندە ۇلتتىق ءبىلىم بەرۋ پلاتفورماسى قۇرىلىپ جاتىر. بۇل تۋرالى ۇكىمەتتىڭ ءباسپاسوز قىزمەتى حابارلادى، دەپ جازادى "ادىرنا".
«جاڭارتىلعان جۇيە 1-سىنىپقا قابىلداۋعا ءوتىنىش بەرۋدى ونلاين فورماتقا كوشىرۋگە مۇمكىندىك بەردى. بۇگىندە 490 مىڭنان استام ءوتىنىش ءتۇستى. تەحنيكالىق، كاسىپتىك جانە ورتا بىلىمنەن كەيىنگى ءبىلىم بەرۋ ۇيىمدارىنا قابىلداۋ دا تولىق اۆتوماتتاندىرىلدى. كوللەدجدەرگە 220 مىڭنان استام تالاپكەر وقۋعا قابىلداندى»، – دەلىنگەن سەنبى كۇنگى حابارلامادا.
پرەمەر-ءمينيستردىڭ ءبىرىنشى ورىنباسارى نۇرلىبەك نالىباەۆ ۇلتتىق ءبىلىم بەرۋ دەرەكتەر بازاسىن جاڭعىرتۋ ماسەلەلەرى بويىنشا كەڭەس وتكىزدى.
جيىندا وقۋ-اعارتۋ ءمينيسترى مەن «قازاقتەلەكوم» اق باسقارما توراعاسىنىڭ جۇيەنى جاڭعىرتۋ جانە ونىڭ نەگىزىندە ۇلتتىق ءبىلىم بەرۋ پلاتفورماسىن قۇرۋ بارىسى تۋرالى ەسەپتەرى تىڭدالدى.
ال شىمكەنت قالاسى، تۇركىستان، اقتوبە جانە الماتى وبلىستارى اكىمدەرىنىڭ ورىنباسارلارى وڭىرلەردەگى ءبىلىم بەرۋ ۇيىمدارىن تسيفرلاندىرۋ جۇمىستارى تۋرالى باياندادى.
نۇرلىبەك نالىباەۆتىڭ ايتۋىنشا، ۇلتتىق ءبىلىم بەرۋ پلاتفورماسىن ەنگىزۋ حالىققا ءبىلىم بەرۋ سالاسىنداعى مەملەكەتتىك قىزمەتتەردى اۆتوماتتاندىرۋعا جانە بيۋدجەت شىعىندارىن قىسقارتۋعا مۇمكىندىك بەرەدى. ۇنەمدەلگەن قاراجات ءبىلىم بەرۋ جۇيەسىنىڭ وزگە دە قاجەتتىلىكتەرىنە باعىتتالماق.
