استانادا تۇرعىن ءۇيدىڭ پاندۋسىنان سىرعاناپ تۇسكەن بالانى كولىك قاعىپ كەتتى. بالا اۋرۋحاناعا جاتقىزىلدى. بۇل تۋرالى Instagram الەۋمەتتىك جەلىسىندە ۆيدەو پايدا بولدى، دەپ حابارلايدى “ادىرنا” ۇلتتىق پورتالى.
بەينەباقىلاۋ كامەرالارىنان الىنعان كادرلاردا بالانىڭ سىرعاناپ ءتۇسىپ، تۇرعىن ۇيلەر اراسىنداعى جولعا شىعىپ كەتكەنى جانە ونى كولىك قاعىپ كەتكەنى كورىنەدى.
پوليتسيا دەپارتامەنتى وقيعاعا قاتىستى پىكىر ءبىلدىردى. وقيعا 10 ناۋرىزدا ساعات 16:45 شاماسىندا امانجول بولەكپاەۆ كوشەسىندەگى ءۇيدىڭ اۋلاسىندا بولعان.
"Mitsubishi اۆتوكولىگىنىڭ جۇرگىزۋشىسى ءدال سول ساتتە پاندۋستان سىرعاناپ تۇسكەن بالانى قاعىپ كەتتى. سالدارىنان 10 جاستاعى بالا ءتۇرلى دەنە جاراقاتىن الىپ، اۋرۋحاناعا جەتكىزىلدى", – دەپ حابارلادى پوليتسيا دەپارتامەنتىنىڭ ءباسپاسوز قىزمەتى.
قۇقىق قورعاۋ ورگاندارى قازىر بۇل وقيعا بويىنشا تەكسەرۋ جۇرگىزىپ جاتىر.
استانا پوليتسياسى جۇرگىزۋشىلەردى اۋلا ىشىندەگى اۋماقتاردا اسا ساق بولۋعا جانە جىلدامدىق رەجيمىن ساقتاۋعا شاقىردى.
