22 ساۋىردە استانادا ورتالىق ازيا ەلدەرىنىڭ كوشباسشىلارى باس قوسادى. بۇل تۋرالى ءۇكىمەتتىڭ ءباسپاسوز قىزمەتى مالىمدەدى، دەپ حابارلايدى «ادىرنا» ءتىلشىسى.
«ەلوردادا ارالدى قۇتقارۋ حالىقارالىق قورىنىڭ مەملەكەت باسشىلارى كەڭەسىنىڭ وتىرىسى وتەدى»،-دەلىنگەن حابارلامادا.
اتالمىش قورعا قازاقستان، قىرعىزستان، تاجىكستان، تۇرىكمەنستان جانە وزبەكستان ەلدەرى كىرەدى.
مەملەكەت باسشىلارىنىڭ وتىرىسى ءار ءۇش جىل سايىن ءبىر رەت وتكىزىلەدى. سوڭعى وتىرىس 2023 جىلى دۋشانبە قالاسىندا وتكەن، سول كەزدە پرەزيدەنت قاسىم-جومارت توقاەۆ قوردىڭ باسشىسى بولىپ ءۇش جىلعا سايلانعان ەدى.
ايتا كەتەيىك، قازاقستان سولتۇستىك ارال تەڭىزىن ساقتاۋ باعىتىندا كەشەندى شارالاردى جۇزەگە اسىرىپ كەلەدى. اتاپ ايتقاندا، سۋ رەسۋرستارى جانە يرريگاتسيا مينيسترلىگى دۇنيەجۇزىلىك بانكپەن بىرلەسىپ، سولتۇستىك ارالدى ساقتاۋ جوباسىنىڭ ەكىنشى كەزەڭىن ازىرلەدى. جوبا اياسىندا تەڭىز دەڭگەيىن بالتىق جۇيەسى بويىنشا 44 مەترگە دەيىن كوتەرۋ ءۇشىن كوكارال بوگەتىن رەكونسترۋكتسيالاۋ كوزدەلگەن. سونىڭ ناتيجەسىندە سۋ ايدىنىنىڭ اۋماعىن 3 913 شارشى شاقىرىمعا دەيىن، ال سۋ كولەمىن 34 ملرد تەكشە مەترگە دەيىن ۇلعايتۋ جوسپارلانىپ وتىر.
