اقش پرەزيدەنتى دونالد ترامپ رەسەيگە قارسى سانكتسيالاردى كۇشەيتۋدى كوزدەيتىن زاڭعا قول قويدى، دەپ حابارلايدى "ادىرنا" ءتىلشىسى.
DW دەرەگىنشە، قۇجاتتى سەناتور ليندسي گرەم مەن دەموكراتيالىق پارتيا وكىلى ريچارد بليۋمەنتال ۇسىنعان. زاڭ جوباسى شامامەن ءبىر جارىم جىل تالقىلانعان.
قۇجاتقا سايكەس، اقش پرەزيدەنتىنە رەسەيدىڭ مۇنايى مەن گازىن ساتىپ الاتىن بەس ءىرى مەملەكەتكە، سونداي-اق رەسەيدىڭ ەنەرگەتيكالىق سانكتسيالاردى اينالىپ وتۋىنە كومەكتەسەتىن بەس ەلگە 100 پايىزعا دەيىن باج سالىعىن ەنگىزۋ قۇقىعى بەرىلدى.
سونىمەن قاتار زاڭ رەسەيدىڭ مەملەكەتتىك قىزمەتكەرلەرىنە، بانكتەرىنە، كاسىپكەرلەرىنە جانە «كولەڭكەلى فلوتىنا» قاتىستى سانكتسيالار ەنگىزۋدى قاراستىرادى. قۇجاتتا رەسەيدەن تابيعي گاز يمپورتى ەلدىڭ جالپى تۇتىنۋىنىڭ 15 پايىزىنان اسپايتىن جانە بۇل تاۋەلدىلىكتى ازايتۋ باعىتىندا شارا قابىلداپ جاتقان مەملەكەتتەرگە قاتىستى ەرەكشەلىكتەر دە قاراستىرىلعان.
باستاپقىدا زاڭ جوباسىندا رەسەيگە جانە ونىڭ مۇنايىن ساتىپ الاتىن مەملەكەتتەرگە 500 پايىزعا دەيىن باج سالىعىن ەنگىزۋ ۇسىنىلعان. كەيىن بۇل مولشەر 100 پايىزعا دەيىن تومەندەتىلدى. زاڭ جوباسىن ليندسي گرەم مەن ريچارد بليۋمەنتال 2025 جىلدىڭ ساۋىرىندە تانىستىرعان. قۇجاتتىڭ قابىلدانۋى شامامەن ءبىر جارىم جىلعا سوزىلدى. ليندسي گرەم 2026 جىلدىڭ 11 شىلدەسىندە قايتىس بولعان.
ۋكراينا پرەزيدەنتى ۆلاديمير زەلەنسكي زاڭعا قول قويعانى ءۇشىن دونالد ترامپقا العىس ءبىلدىردى. ول سانكتسيالار رەسەيگە قىسىمدى كۇشەيتىپ، سوعىستى توقتاتۋعا ىقپال ەتۋى قاجەت ەكەنىن اتاپ ءوتتى.
زاڭنىڭ سوڭعى نۇسقاسىندا سانكتسيالاردى ەنگىزۋ نەمەسە كۇشىن جويۋ ماسەلەسىندە اقش پرەزيدەنتىنىڭ وكىلەتتىگى كەڭەيتىلگەن. بۇل وزگەرىسكە اقش كونگرەسىندەگى دەموكراتتار تاراپىنان سىن ايتىلدى.
