قازاقستاندىق Elem Group كومپانياسى ۋكرايناداعى رەسەي ارمياسىن قامتاماسىز ەتتى دەگەن كۇدىككە ءىلىندى. بۇل تۋرالى «ازاتتىق» راديوسى جاريالادى، دەپ حابارلايدى “ادىرنا” ۇلتتىق پورتالى.
«ازاتتىق راديوسىنىڭ ماۋسىم ايىندا جۇرگىزگەن تەرگەۋى رەسەيدىڭ 2022 جىلدىڭ اقپانىندا ۋكرايناعا جاپپاي باسىپ كىرۋىنەن كەيىن «سترەلوي ە-كوممەرتس» قازاقستاندا ورنالاسقان Elem Group ەنشىلەس كومپانياسىنان ەكى ماقساتتاعى تاۋارلاردىڭ جۇزدەگەن جونەلتىلىمدەرىن العانىن انىقتادى»، - دەلىنگەن حابارلامادا.
رەسەيلىك كومپانيا قازاقستاننان سانكتسياعا ۇشىراعان جۇزدەگەن تاۋارلاردى العانى كورسەتىلگەن.
«كرەمل رەسەيدى سوعىس ۋاقىتىنداعى ەكونوميكاعا اينالدىرۋدا، بىراق ءپۋتيننىڭ سوعىس ماشيناسى تەك وتاندىق وندىرىسپەن اينالىسا المايدى. ءبىزدىڭ سانكتسيالارىمىز رەسەيگە ءوزىنىڭ اسكەري ونەركاسىپتىك بازاسىن قۇرۋ جانە قولداۋ ءۇشىن قاجەتتى قۇرامداس بولىكتەرمەن قامتاماسىز ەتەتىن ءۇشىنشى ەلدەردىڭ دايىن جەتكىزۋشىلەرى مەن جەلىلەرىنە قىسىمدى كۇشەيتۋدى جالعاستىرۋدا»، - دەدى اقش قارجى ءمينيسترى دجانەت يەللەن.
ايتا كەتسەك، Elem Group الماتىدا 2022 جىلدىڭ 14 ناۋرىزىندا تىركەلگەن. ولاردىڭ ۆەب-سايتىندا ونەركاسىپتىك جابدىقتىڭ جوبالىق لوگيستيكاسىنا ماماندانعاندىعى ايتىلعان.
بۇعان دەيىن قازاقستاندىق «اسپان اربا» كومپانياسى رەسەيگە ۇشقىشسىز ۇشاقتاردى جەتكىزىپ جاتقانىن ايتىلدى. سونداي-اق، قازاقستاندىق ەكى كومپانيا جاۋاپكەرشىلىگى شەكتەۋلى سەرىكتەستىگى «يتس – استانا» جشس مەن «تىنىس» اق ۋكراينالىق سانكتسيالارعا ۇشىرادى.
