ازەربايجاندا ۇلتتىق مۋزىكا كۇنى اتالىپ وتۋدە

ۇزەير گادجيبەيلي 1885 جىلعى 18 قىركۇيەكتە دۇنيەگە كەلگەن. ونىڭ تۋعان كۇنى ازەربايجاندا ۇلتتىق مۋزىكا كۇنى رەتىندە اتاپ وتىلەدى. 2009 جىلدان بەرى كومپوزيتوردىڭ شىعارماشىلىعىنا ارنالعان حالىقارالىق مۋزىكا فەستيۆالى وتكىزىلىپ كەلەدى.

گادجيبەيليدىڭ ەسىمى ازەربايجاننىڭ وپەرا ونەرىنىڭ قالىپتاسۋىمەن تىعىز بايلانىستى. 1908 جىلى ونىڭ ء«لايلى مەن ءماجنۇن» وپەراسى العاش رەت باكۋدە ساحنالاندى. شىعارما اقىن مۇحاممەد ءفيزۋليدىڭ اتتاس پوەماسى نەگىزىندە جازىلعان.

ء«لايلى مەن ءماجنۇن» ازەربايجانداعى جانە شىعىستاعى العاشقى وپەرا رەتىندە تاريحتا قالدى. ونىڭ پرەمەراسىنان كەيىن «شەيح سانان»، «رۇستەم مەن سوحراب»، «شاح ابباس پەن حۋرشيدبانۋ»، «اسلي مەن كەرەم» جانە «حارۋن مەن ءلايلا» سياقتى ۇلتتىق وپەرالار دۇنيەگە كەلدى.

گادجيبەيلي سونىمەن قاتار ازەربايجانداعى العاشقى مۋزىكالىق كومەديالاردىڭ نەگىزىن قالاۋشىلاردىڭ ءبىر. ونىڭ «كۇيەۋ مەن ايەل» شىعارماسى 1910 جىلى العاش رەت ساحنالانعان.

كومپوزيتوردىڭ شىعارماشىلىق مۇراسىندا وپەرالار مەن مۋزىكالىق كومەديالاردان بولەك، اندەر، رومانستار، كانتاتالار، كامەرالىق جانە حور شىعارمالارى بار. ول 300-دەن استام حالىق ءانىن نوتاعا تۇسىرگەن.

ۇزەير گادجيبەيليدىڭ شىعارماشىلىعى ازەربايجاننىڭ ۇلتتىق مۋزىكا مادەنيەتىنىڭ قالىپتاسۋىنا ەلەۋلى ىقپال ەتتى. ونىڭ مۇراسى بۇگىندە دە ەلدىڭ مۋزىكالىق مادەنيەتىنىڭ ماڭىزدى بولىگى سانالادى.