پرەزيدەنت قاسىم-جومارت توقاەۆ ازەربايجان پرەزيدەنتى يلحام اليەۆپەن تەلەفون ارقىلى سويلەسىپ، اقش پرەزيدەنتى دونالد ترامپتىڭ قاتىسۋىمەن ۆاشينگتوندا ازەربايجان مەن ارمەنيا اراسىنداعى قاقتىعىستى بەيبىت جولمەن رەتتەۋ تۋرالى تاريحي دەكلاراتسياعا قول قويىلۋىمەن قۇتتىقتادى، دەپ حابارلايدى "ادىرنا" ۇلتتىق پورتالى.
مەملەكەت باسشىسى قۇجاتتىڭ حالىقارالىق قۇقىق نورمالارى مەن بۇۇ جارعىسىنا ساي قابىلدانعانىن جانە بۇل قادامنىڭ ەكى ەلدىڭ ستراتەگيالىق مۇددەلەرىنە تولىق سايكەس كەلەتىنىن اتاپ ءوتتى. توقاەۆتىڭ ايتۋىنشا، بۇل كەلىسىم كاۆكاز وڭىرىندە حالىقارالىق ىنتىماقتاستىقتى كەڭەيتۋگە ىقپال ەتەدى. قازاقستان ازەربايجاننىڭ ستراتەگيالىق سەرىكتەسى رەتىندە وڭىردە بەيبىتشىلىكتىڭ ورناۋىن شىن جۇرەكتەن قولدايدى.
اڭگىمە بارىسىندا قاسىم-جومارت توقاەۆ استانانىڭ الداعى ۋاقىتتا كەلىسسوزدەر الاڭىن ۇسىنۋعا دايىن ەكەنىن راستادى. سونداي-اق ول اليەۆتىڭ كوشباسشىلىعىمەن ازەربايجاننىڭ حالىقارالىق بەدەلى ارتا تۇسكەنىن ايتتى.
ءوز كەزەگىندە يلحام اليەۆ توقاەۆتىڭ قۇتتىقتاۋىنا العىس ءبىلدىرىپ، ۇزاق جىلدار بويى ناتيجەسىز وتكەن كەلىسسوزدەردەن كەيىن قول جەتكىزىلگەن بۇل كەلىسىمنىڭ تاريحي ماڭىزىن اتاپ ءوتتى. ازەربايجان پرەزيدەنتى قازاقستانمەن جان-جاقتى ىنتىماقتاستىقتى ودان ءارى نىعايتۋعا نيەتتى ەكەنىن جەتكىزدى.
سۇحبات سوڭىندا تاراپتار جوعارى دەڭگەيدەگى بايلانىستاردى جالعاستىرۋعا ۋاعدالاستى.
