بۇگىن، 6 ماۋسىم ازەربايجان استاناسىندا تۇركى مەملەكەتتەرى پارلامەنتتىك اسسامبلەياسىنىڭ (تۇركپا) ءحىىى پلەنارلىق وتىرىسى جانە اسسامبلەيا كەڭەسىنىڭ وتىرىسى ءوتتى. ءىس-شارالارعا ءماجىلىس توراعاسى ەرلان قوشانوۆ باستاعان قازاقستان پارلامەنتىنىڭ دەلەگاتسياسى قاتىستى.
تۇركى مەملەكەتتەرى پارلامەنتتەرى باسشىلارىنىڭ بۇگىنگى كەزدەسۋى «تۇركى الەمى الدىنداعى جاسىل كوكجيەكتەر: جاسىل كۇن تارتىبىنە قول جەتكىزۋدەگى پارلامەنتتەردىڭ ءرولى» تاقىرىبىنا ارنالدى.
ساپار ازەربايجان رەسپۋبليكاسىنىڭ پرەزيدەنتى يلحام اليەۆتىڭ پارلامەنتتەر دەلەگاتسيالارىنىڭ باسشىلارىمەن كەزدەسۋىنەن باستالدى. ازەربايجان باسشىسى تۇركى مەملەكەتتەرىنىڭ تابىستى ينتەگراتسياسىنداعى زاڭ شىعارۋشى ورگانداردىڭ ءرولىن اتاپ ءوتتى. ءماجىلىس سپيكەرى قازاقستان پرەزيدەنتى قاسىم-جومارت توقاەۆتىڭ سالەمى مەن جىلى لەبىزىن جەتكىزدى.
«بۇگىندە قازاقستان مەن ازەربايجان بايلانىسى ۇلگى بولارلىق دەڭگەيدە. قاسىم-جومارت كەمەلۇلى مەن ءسىزدىڭ ارالارىڭىزداعى تىعىز سەنىمدى ديالوگ – ءبىزدىڭ تابىستى ىنتىماقتاستىعىمىزدىڭ كەپىلى. قازاقستان مەن ازەربايجان پارلامەنتتەرى دە وسىنداي سەنىم مەن ىنتىماقتاستىق رۋحىندا جۇمىس ىستەپ جاتىر دەپ سەنىممەن ايتا الامىن»، – دەدى ەرلان قوشانوۆ.
تۇركپا كەڭەسىنىڭ وتىرىسىندا ۇيىمعا توراعالىق ەتۋدى ازەربايجان رەسپۋبليكاسىنىڭ ميللي ءماجىلىسى قابىلدادى.
پلەنارلىق سەسسيادا ءسوز سويلەگەن ەرلان قوشانوۆ تۇركپا قازاقستاننىڭ باستاماسىمەن تۇركى بىرلىگىن نىعايتۋ ءۇشىن پارلامەنتتىك الاڭ رەتىندە قۇرىلعانىن اتاپ ءوتتى. 15 جىلدان بەرى ۇيىم بۇل ميسسيانى ءساتتى ورىنداپ كەلەدى.
جيىن تاقىرىبىنىڭ وزەكتىلىگىنە توقتالعان ءماجىلىس سپيكەرى جاسىل ەنەرگەتيكاعا كوشۋ جانە كومىرتەگى بەيتاراپتىعى ۇيىمعا قاتىسۋشى ەلدەر ءۇشىن كليماتتىق كۇن تارتىبىندەگى ورتاق ماقسات ەكەنىن اتاپ ءوتتى.
«قازاقستان پرەزيدەنتى قاسىم-جومارت توقاەۆ بۇعان ەرەكشە كوڭىل ءبولىپ وتىر. قازاقستان كليمات بويىنشا حالىقارالىق شارتتار مىندەتتەمەلەرىنە قول جەتكىزۋگە باعىتتالعان جۇمىستى جۇرگىزۋدە. ماسەلەن، بىلتىر 2060 جىلعا دەيىنگى كومىرتەگى بەيتاراپتىعىنا قول جەتكىزۋ ستراتەگياسى بەكىتىلدى. سۋ جانە سالىق كودەكستەرى ازىرلەنۋدە. وندا «جاسىل كۇن ءتارتىبى» ەسكەرىلۋدە. پارلامەنت بۇل جۇمىسقا تولىعىمەن اتسالىسۋدا»، – دەدى ەرلان قوشانوۆ.
ءماجىلىس توراعاسى «جاسىل قازاقستان» ۇلتتىق باعدارلاماسىنىڭ جۇزەگە اسىرىلۋ بارىسى تۋرالى اقپارات بەردى. ونىڭ اياسىندا ەكوجۇيەنى قورعاۋ بويىنشا اۋقىمدى جوبالار قولعا الىنعانىن ايتىپ، كليماتتىڭ وزگەرۋىنە قارسى كۇرەستەگى ازەربايجاننىڭ باستامالارىنا قولداۋ ءبىلدىردى. وسىعان بايلانىستى ەرلان قوشانوۆ ازەربايجانعا بيىل قاراشا ايىندا باكۋدە وتەتىن بىرىككەن ۇلتتار ۇيىمىنىڭ كليماتتىڭ وزگەرۋى تۋرالى نەگىزدەمەلىك كونۆەنتسياسى (COP29) تاراپتارىنىڭ 29-كونفەرەنتسياسىنىڭ تابىستى ءوتۋىن تىلەدى.
سونىمەن بىرگە ءماجىلىس سپيكەرى جاسىل ەكونوميكا تاۋارلارى مەن قىزمەتتەرىنىڭ ستاندارتتارىنا ورتاق كوزقاراس قالىپتاستىرۋ قاجەتتىگىنە نازار اۋداردى.
كەزدەسۋدە تاراپتار تۇركپا ەلدەرىنە ارنالعان بىرقاتار مودەلدىك زاڭ قابىلداۋ ماسەلەسىن دە تالقىلادى. ولاردىڭ قاتارىندا جەكە دەرەكتەردى قورعاۋ، ەڭبەك نارىعىنىڭ تالاپتارىنا ساي كادر دايارلاۋ، ساۋدا وكىلدىكتەرى، اينالىمعا شىعارىلاتىن ونىمدەردىڭ قاۋىپسىزدىگى مەن ساپاسى جانە تەمەكى ونىمدەرىن پايدالانۋدى شەكتەۋ تۋرالى زاڭ جوبالارى بار.
اسسامبلەيانىڭ XIII وتىرىسى الاڭىندا نەگىزگى سەسسيادان بولەك دەپۋتاتتاردىڭ قاتىسۋىمەن پارلامەنتشى ايەلدەردىڭ، جاستار توبىنىڭ، سونداي-اق تۇركپا اياسىنداعى پارلامەنت اپپاراتتارى باسشىلارىنىڭ كەزدەسۋلەرى ءوتتى.
تۇركپا-نىڭ XIII پلەنارلىق وتىرىسىنىڭ قورىتىندىسى بويىنشا قاتىسۋشىلار باكۋ دەكلاراتسياسىن قابىلدادى.
سونداي-اق وتىرىس كۇنى پارلامەنتتەر سپيكەرلەرى ازەربايجان ۇلتىنىڭ كوشباسشىسى گەيدار اليەۆتىڭ رۋحىنا تاعزىم ەتىپ، ماڭگىلىك الاۋعا گۇل شوقتارىن قويدى.
