اقمولا وبلىسىندا تاۋ-كەن مەتاللۋرگيا سالاسىنداعى ءىرى ينۆەستيتسيالىق جوبانىڭ جۇزەگە اسۋىنا جول اشىلدى. بۇگىن بۋراباي اۋدانىنداعى رايگورودوك كەن ورنىندا جاڭا التىن ءوندىرۋ فابريكاسىنىڭ قۇرىلىسى باستالۋىنا وراي ەستەلىك كاپسۋلا سالىندى. سيمۆولدىق ءراسىم وڭىردەگى وندىرىستىك قۋاتتى ارتتىرىپ، وبلىستىڭ دامۋىنا جاڭا سەرپىن بەرەتىن جوبانىڭ باستالعانىن بىلدىرەدى.
سالتاناتتى راسىمگە اقمولا وبلىسىنىڭ اكىمى مارات احمەتجانوۆ، ونەركاسىپ جانە قۇرىلىس ءمينيسترى ەرسايىن ناعاسپاەۆ، حالىقارالىق Zijin Mining توبىنىڭ جانە Zijin RG Gold كومپانياسىنىڭ باسشىلىعى مەن وكىلدەرى قاتىستى. كاپسۋلاعا بولاشاق ۇرپاققا ارنالعان جولداۋ سالىنىپ، ونى 2076 جىلى اشۋ جوسپارلانىپ وتىر.
اقمولا وبلىسى ءۇشىن بۇل باعىتتى دامىتۋ ايرىقشا ماڭىزعا يە. ءوڭىر اۋىل شارۋاشىلىعى سالاسىنداعى جوعارى كورسەتكىشتەرىمەن بۇرىننان تانىمال. مۇندا جىل سايىن مول استىق جينالىپ، اۋىل شارۋاشىلىعى ونىمدەرىن وڭدەۋ دامىپ، ءىرى اگروونەركاسىپتىك بازا قالىپتاسقان. سونىمەن قاتار وبلىس ەكونوميكاسى اگرارلىق سەكتورمەن عانا شەكتەلمەيدى. بۇگىندە ونەركاسىپ، پايدالى قازبالاردى ءوندىرۋ جانە وڭدەۋ سالالارى قاتار دامىپ، ءىرى ينۆەستيتسيالىق جوبالار ءوڭىردىڭ وندىرىستىك مۇمكىندىكتەرىن كەڭەيتىپ كەلەدى.
التىن ءوندىرۋ سالاسىنىڭ اۋقىمى دا ايقىن. اقمولا وبلىسى دورە قورىتپاسىن ءوندىرۋ بويىنشا رەسپۋبليكادا ءبىرىنشى ورىندا تۇر. ءوڭىر ەلىمىزدەگى جالپى ءوندىرىس كولەمىنىڭ 54 پايىزىن قامتاماسىز ەتەدى. وبلىستا «التىنتاۋ كوكشەتاۋ» جانە «قازاقالتىن» كونتسەرنىنىڭ كاسىپورىندارى سياقتى ءىرى ءوندىرىس ورىندارى جۇمىس ىستەيدى. بۇل رەتتە سالاداعى دامۋ قارقىنى جالعاسۋدا. «التىنتاۋ كوكشەتاۋ» كاسىپورنىندا جەراستى ءوندىرۋ تاسىلىنە كوشۋ باستالسا، رايگورودوك كەن ورنىندا ءوندىرىستى كەڭەيتۋدىڭ جاڭا كەزەڭىنە بۇگىن قادام جاسالدى.
«بۇگىن ءبىز جاي عانا ەستەلىك كاپسۋلا سالىپ وتىرعان جوقپىز. رايگورودوك كەن ورنىن جانە اقمولا وبلىسىنىڭ تاۋ-كەن مەتاللۋرگيا سالاسىن دامىتۋدىڭ جاڭا ءىرى كەزەڭىنە جول اشىپ وتىرمىز. بۇل جوبانى ىسكە اسىرۋ وندىرىستىك قۋاتتى ەداۋىر ارتتىرۋعا، جاڭا جۇمىس ورىندارىن اشۋعا جانە ءوڭىردىڭ ەلىمىزدەگى جەتەكشى التىن ءوندىرۋ ورتالىقتارىنىڭ ءبىرى رەتىندەگى پوزيتسياسىن نىعايتۋعا مۇمكىندىك بەرەدى. ءبىز ءۇشىن ءوندىرىس كولەمىنىڭ ارتۋى ءوڭىر تۇرعىندارى، جەرگىلىكتى بيزنەس جانە جالپى ءوڭىردىڭ تەحنولوگيالىق دامۋى ءۇشىن جاڭا مۇمكىندىكتەر قالىپتاستىراتىنى اسا ماڭىزدى»، – دەدى اقمولا وبلىسىنىڭ اكىمى مارات احمەتجانوۆ.
ايتا كەتەيىك، رايگورودوك كەن ورنىندا بۇگىندە جۇمىس ىستەپ تۇرعان وندىرىستىك بازا بار. 2022 جىلى مۇندا جىلىنا 6,5 ملن توننا كەن وڭدەۋگە قاۋقارلى بايىتۋ فابريكاسى ىسكە قوسىلعان بولاتىن. ەندى Zijin RG Gold كومپانياسى قۋاتى جىلىنا 10 ملن توننا بولاتىن جاڭا التىن ءوندىرۋ فابريكاسىنىڭ قۇرىلىسىن باستايدى. جوبا تولىق ىسكە اسقاننان كەيىن كەشەننىڭ تاۋ-كەن جانە وڭدەۋ قۋاتى جىلىنا 16 ملن توننا كەندى قۇرايدى.
وڭدەۋ كولەمىنىڭ ۇلعايۋىمەن دورە قورىتپاسىن ءوندىرۋ كولەمى دە ارتادى. كەشەن بويىنشا التىن ءوندىرۋ كولەمى جىلىنا 12 توننادان اسادى دەپ جوسپارلانىپ وتىر.
جوبا قولدانىستاعى ءوندىرىستى كەڭەيتۋمەن عانا شەكتەلمەيدى. جاڭا وندىرىستىك كەشەن اياسىندا ەنەرگەتيكا جانە سۋمەن جابدىقتاۋ نىساندارى، قالدىق قويماسى، تاۋ-كەن جانە كولىك ينفراقۇرىلىمى، جوندەۋ جانە قويما عيماراتتارى، اكىمشىلىك نىساندار مەن ۆاحتالىق كەنت سالۋ كوزدەلگەن.
جوبانىڭ تاعى ءبىر ماڭىزدى باعىتى – تەحنولوگيالىق جاڭعىرتۋ. كومپانيا زاماناۋي اۆتوماتتاندىرۋ جۇيەلەرىن ەنگىزىپ، تاۋ-كەن تەحنيكاسى پاركىن جاڭارتىپ، ءوندىرىس تيىمدىلىگىن ارتتىرۋدى جوسپارلاپ وتىر. گيبريدتى ديزەل-ەلەكتر جەتەگى بار تەحنيكانى پايدالانۋ وتىن شىعىنى مەن شىعارىندىلاردى ازايتىپ، ءوندىرىستىڭ تيىمدىلىگىن ارتتىرۋعا مۇمكىندىك بەرەدى.
«كەڭەيتۋ جۇمىستارى كەن ورنىنىڭ رەسۋرستىق الەۋەتىن ءتيىمدى پايدالانۋعا جانە كومپانيانىڭ وندىرىستىك بازاسىن نىعايتۋعا مۇمكىندىك بەرەدى. ءبىز حالىقارالىق تاجىريبە مەن وزىق پراكتيكالارعا سۇيەنىپ، ولاردى جەرگىلىكتى جاعدايعا، قازاقستان زاڭناماسىنا جانە كاسىپورىننىڭ ەرەكشەلىكتەرىنە بەيىمدەي وتىرىپ قولداناتىن بولامىز»، – دەدى Zijin RG Gold كومپانياسىنىڭ باس ديرەكتورى لي كايۆەن.
ءوڭىر ءۇشىن ءىرى ءوندىرىستىڭ كاسىپورىن اۋماعىنان تىس جەرلەردە دە سۇرانىس قالىپتاستىراتىنى ماڭىزدى. وندىرىستىك قۋات ارتقان سايىن ماماندارعا، قىزمەتتەرگە، ماتەريالدار مەن جەرگىلىكتى جەتكىزۋشىلەردىڭ ونىمدەرىنە دەگەن قاجەتتىلىك تە وسەدى. بۇگىندە Zijin RG Gold كومپانياسىندا 1,8 مىڭنان استام ادام جۇمىس ىستەيدى. ونىڭ 51 پايىزى – اقمولا وبلىسىنىڭ تۇرعىندارى.
وسىنداي جوبالاردىڭ نەگىزگى ناتيجەسى دە وسىندا. وندىرىستىك قۋات كورسەتكىشتەرىنىڭ ارتىندا ادامدار ءۇشىن ناقتى مۇمكىندىكتەر تۇر. جاڭا كاسىپورىندار جۇمىس ورىندارىن اشىپ، ماماندارعا زاماناۋي تەحنولوگيالاردى مەڭگەرۋگە جانە كومپانيا ىشىندە كاسىبي تۇرعىدان وسۋگە مۇمكىندىك بەرەدى. ال شاعىن جانە ورتا بيزنەس ءۇشىن جاڭا تاپسىرىس بەرۋشىلەرمەن جۇمىس ىستەۋگە جول اشادى.
ء«بىز ءۇشىن بۇل جوبا تەك وندىرىستىك قۋاتتى ارتتىرۋمەن شەكتەلمەيدى. بۇل – ءوڭىردىڭ دامۋىنا، حالىقتى جۇمىسپەن قامتۋعا جانە كاسىبي وسۋىنە، شاعىن جانە ورتا بيزنەستى دامىتۋعا، سونداي-اق وبلىس ەكونوميكاسىن نىعايتۋعا باعىتتالعان ينۆەستيتسيا»، – دەپ اتاپ ءوتتى Zijin RG Gold كومپانياسىنىڭ تەڭ باس ديرەكتورى مارات شايماردانوۆ.
بۇگىندە اقمولا وبلىسى اۋىل شارۋاشىلىعىنداعى جوعارى ناتيجەلەرىن ساقتاي وتىرىپ، ونەركاسىپ ءوندىرىسىن ۇلعايتىپ، وڭدەۋ جانە ءوندىرۋ سالالارىنداعى ينۆەستيتسيالىق جوبالاردى بەلسەندى تۇردە تارتىپ كەلەدى. سوندىقتان رايگورودوكتا بۇگىن سالىنعان كاپسۋلا – كەزەكتى زاۋىتتىڭ قۇرىلىسىنا قاتىستى عانا سيمۆولدىق وقيعا ەمەس. بۇل – تابيعي رەسۋرستار، ينۆەستيتسيالار مەن زاماناۋي تەحنولوگيالار ءوندىرىستىڭ دامۋىنا، ال تۇپتەپ كەلگەندە، حالىق ءۇشىن جاڭا مۇمكىندىكتەردىڭ قالىپتاسۋىنا قىزمەت ەتەتىن ءوڭىردىڭ جالپى ەكونوميكالىق دامۋ باعىتىنىڭ جالعاسى.
بۇگىن كاپسۋلاعا سالىنعان بولاشاققا ارنالعان جولداۋ دا ناقتى ءبىر كەن ورنىمەن عانا بايلانىستى ەمەس. ول ءوڭىردىڭ بۇگىنگى نەگىزگى مىندەتىن ايقىن كورسەتەدى. بۇل – جاڭا وندىرىستەر قۇرۋ، قايتا وڭدەۋدى دامىتۋ، ينۆەستورلار تارتۋ جانە ەكونوميكالىق ءوسۋدىڭ باستى ناتيجەسى اقمولا وبلىسىنىڭ تۇرعىندارى ءۇشىن ناقتى مۇمكىندىكتەرگە اينالاتىن جاعداي قالىپتاستىرۋ.
