اقمولا وبلىسىنداعى جاباي وزەنىندە سۋ دەڭگەيى كۇرت كوتەرىلىپ، اتباسار قالاسىنا سۋ كىردى. وسىعان وراي قالا اكىمى امانبەك كالجانوۆ وڭىردە توتەنشە جاعداي جاريالاپ، حالىققا ۇندەۋ جولدادى، دەپ حابارلايدى ”ادىرنا” ۇلتتىق پورتالى.
بۇگىن تاڭعى بەسكە تاياۋ توپىراقتان جاسالعان دامبا 6 جەردەن بۇزىلىپ، قىزىل سۋ ىرىق بەرمەي كەتكەن. بىردەن قالادا دابىل جۇيەسى ىسكە قوسىلدى. 7 ۋاقىتشا ورنالاسۋ پۋنكتى ۇيىمداستىرىلىپ، سۋ باسقان ۇيلەردىڭ تۇرعىندارى ەۆاكۋاتسيالانىپ جاتىر. بىردەن اۋدان اكىمى حالىققا ۇندەۋ جاساپ، قاۋىپتى ايماقتاعى حالىقتى دا جىلدام كوشۋگە شاقىردى. سۋ سورۋ جۇمىستارىنا 400-دەن استام ادام، 100 تەحنيكا جۇمىلدىرىلعان. جەرگىلىكتى دەڭگەيدەگى توتەنشە جاعداي جاريالاندى.
«جاباي وزەنىندەگى سۋ دەڭگەيىنىڭ كۇرت كوتەرىلۋىنە بايلانىستى تاڭعى 4:43 شاماسىندا 6 جەر ۋچاسكەسىنە سۋ جايىلدى. سالدارىنان قالانى سۋ باستى. سۋ دەڭگەيى قاۋىپتى 5.95 مەترگە دەيىن كوتەرىلدى. ءالى دە كوتەرىلىپ جاتىر. وسىعان بايلانىستى سۋ باساتىن ايماق تۇرعىندارىنا قاۋىپسىز ورىندارعا كوشۋ ۇسىنىلادى»، – دەدى اكىم.
اكىم تۇرعىندارعا ارنايى ەۆاكۋاتسيالىق ورىندار دايىندالعانىن ايتتى. سونىمەن بىرگە سۋ تاسقىنىنان زارداپ شەككەن حالىققا كومەك بەرىلىپ، ۇيلەرى قالپىنا كەلتىرىلەتىنىن جەتكىزدى.
ءوڭىر اكىمدىگىنىڭ سوڭعى اقپاراتىنا سايكەس سۋ دەڭگەيى 6,1 مەترگە دەيىن كوتەرىلگەن. قاۋىپتى دەڭگەي 4,45 مەتردى قۇرايدى.
ايتا كەتەيىك، اتباساردى وسىمەن ءۇشىنشى رەت سۋ باسۋدا. مۇنىڭ الدىندا قالا 2014 جىلى، 2017 جىلى سۋ استىندا قالعان. وزەن جاعالاۋى ماڭىندا ورنالاسقان 130-عا جۋىق ءۇي سۋعا كەتكەن. 100-دەن استام ادام ەۆاكۋاتسيالانعان. كەي تۇرعىندار ۇيلەرىنەن كەتۋگە كەلىسپەگەن.
