اقمولا وبلىسىندا شامامەن 17 توننا ساڭىراۋقۇلاق تيەگەن جۇك كولىگى اۋدارىلىپ قالدى. وقيعا 18 ماۋسىمعا قاراعان ءتۇنى استانا – اتباسار – جاقسى اۆتوجولىنىڭ 327-شاقىرىمىندا بولعان، دەپ حابارلايدى "ادىرنا".
پوليتسيانىڭ الدىن الا مالىمەتىنشە، Mercedes-Benz جۇك كولىگىنىڭ جۇرگىزۋشىسى كولىك تىزگىنىنە يە بولا الماي، جول جيەگىندەگى كيۋۆەتكە ءتۇسىپ كەتكەن. سونىڭ سالدارىنان فۋرا اۋدارىلعان.
وقيعا ورنىنا جەتكەن پاترۋلدىك پوليتسيا قىزمەتكەرلەرى جۇرگىزۋشىنىڭ مەديتسينالىق كومەككە مۇقتاج ەمەستىگىن انىقتاپ، جول قوزعالىسىنىڭ قاۋىپسىزدىگىن قامتاماسىز ەتتى.
جۇرگىزۋشىنىڭ ايتۋىنشا، جۇك رەسەيدەن قوستاناي ارقىلى استاناعا جەتكىزىلىپ جاتقان. ول جولدا جەتكىلىكتى دەمالماعانىن جانە رولدە وتىرىپ قالعىپ كەتۋى مۇمكىن ەكەنىن ايتقان.
اپات كەزىندە كابينادا جۇرگىزۋشىنىڭ ءوزى عانا بولعان. كولىك قاتتى زاقىمدانعانىمەن، ەر ادام زارداپ شەككەن جوق. پوليتسەيلەردىڭ مالىمەتىنشە، ونىڭ قاۋىپسىزدىك بەلدىگىن تاققانى اۋىر زارداپتاردىڭ الدىن العان.
جول قوزعالىسى ەرەجەلەرىن بۇزۋ فاكتىسى بويىنشا جۇرگىزۋشى اكىمشىلىك جاۋاپكەرشىلىككە تارتىلدى.
