2025 جىلدىڭ 27 ماۋسىمىندا رەسەيدىڭ ەكاتەرينبۋرگ قالاسىندا بولعان وقيعا حالىقارالىق رەزونانس تۋدىردى. ازەربايجاننىڭ باس پروكۋراتۋراسى رەسەي قۇقىق قورعاۋ ورگاندارى تاراپىنان ازەربايجان ازاماتتارىنا قاتىستى قاتىگەزدىك پەن ازاپتاۋ فاكتىلەرى بويىنشا قىلمىستىق ءىس قوزعاعانىن مالىمدەدى. بۇل تۋرالى Report اگەنتتىگى جازدى، دەپ حابارلايدى “ادىرنا”.
الدىن الا تەرگەۋ دەرەكتەرىنە سايكەس، 27 ماۋسىم كۇنى تاڭەرتەڭ ەكاتەرينبۋرگ قالاسىندا رەسەيدىڭ ۇلتتىق گۆاردياسى، ءىىم جانە فقق-ءنىڭ سۆەردلوۆ وبلىسى بويىنشا بولىمشەلەرى بىرلەسىپ جەدەل-ىزدەستىرۋ شارالارىن وتكىزگەن. بۇل ءىس-شارا بارىسىندا ەكاتەرينبۋرگتەگى ءارتۇرلى مەكەنجايلاردا تۇراتىن ازەربايجان ازاماتتارى بۇرىن جاسالعان قىلمىستارعا قاتىسى بار دەگەن كۇدىكپەن ۇستالعان.
ۇستالعان ازاماتتاردىڭ ەركىندىگى شەكتەلىپ، ولاردى ۇستاۋ، تاسىمالداۋ جانە اكىمشىلىك عيماراتتاردا ۇستاۋ كەزىندە رەسەي قۇرىلىمدارىنىڭ قىزمەتكەرلەرى ولاردىڭ دەنەسىنىڭ ءارتۇرلى بولىكتەرىنە بىرنەشە رەت سوققى جاساعان. كۇدىكتىلەر ازاپتاۋعا ۇشىراپ، اۋىر دەنە جاراقاتتارىن العان.
سالدارىنان، 60 جاستاعى ازەربايجان ازاماتى، ۇساق كاسىپپەن اينالىسقان گۋسەين سافاروۆ جەرگىلىكتى ۋاقىت بويىنشا شامامەن 15:00-دە ەكاتەرينبۋرگتەگى ءىىم اكىمشىلىك عيماراتىندا كوز جۇمدى. ونىڭ ءىنىسى – 55 جاستاعى تاكسي جۇرگىزۋشىسى زياددين سافاروۆ تا سول كۇنى تاڭەرتەڭ جەدەل توپتىڭ قىزمەتتىك كولىگىندە اسا قاتىگەزدىكپەن ولتىرىلگەن.
سوت-مەديتسينالىق ساراپتاما ناتيجەسى بويىنشا، گۋسەين سافاروۆ كوپتەگەن جاراقات، سونىڭ ىشىندە بىرنەشە قابىرعا سىنىقتارى سالدارىنان تۋىنداعان جاراقاتتىق جانە قان كەتۋدەن كوز جۇمعان. زياددين سافاروۆ تا كوپتەگەن دەنە جاراقاتىنىڭ سالدارىنان قايتىس بولعان.
سول وپەراتسيا اياسىندا ۇستالعان باسقا دا ازەربايجان ازاماتتارىنا ءارتۇرلى اۋىرلىقتاعى دەنە جاراقاتتارى سالىنعانى انىقتالدى، قازىرگى ۋاقىتتا ولار رەسەيدەگى مەديتسينالىق مەكەمەلەردە ەم قابىلداۋدا.
جينالعان ماتەريالدار نەگىزىندە ازەربايجاننىڭ باس پروكۋرورى قىلمىستىق كودەكستىڭ 12.2 (ەل اۋماعىنان تىس جەردە ازەربايجان ازاماتىنا قارسى جاسالعان قىلمىس), 120.2.1 (توپپەن جاسالعان قاساقانا كىسى ءولتىرۋ), 120.2.4 (اسا قاتىگەزدىكپەن نەمەسە قوعامدىق قاۋىپ توندىرەتىن تاسىلمەن جاسالعان كىسى ءولتىرۋ), 120.2.7 (ەكى نەمەسە ودان دا كوپ ادامدى ءولتىرۋ), 120.2.9 (الدىن الا كەلىسىم بويىنشا جاسالعان كىسى ءولتىرۋ), 309.2 (اۋىر سالدارعا اكەپ سوققان قىزمەتتىك وكىلەتتىكتى اسىرا پايدالانۋ), 293.3 (ولىمگە اكەپ سوققان ازاپتاۋ نەمەسە باسقا دا قاتىگەز، ادامگەرشىلىككە جاتپايتىن نەمەسە قادىر-قاسيەتتى قورلايتىن ءىس-ارەكەت نەمەسە جازا) باپتارى بويىنشا قىلمىستىق ءىس قوزعادى.
الدىن الا تەرگەۋ ازەربايجان باس پروكۋراتۋراسىنىڭ تەرگەۋ باسقارماسىنا تاپسىرىلدى. ارنايى تەرگەۋ توبى قۇرىلىپ، بەلسەندى تەرگەۋ ارەكەتتەرى جۇرگىزىلۋدە. باس پروكۋراتۋرا بۇل ءىستى ءتيىمدى تەرگەۋ جانە كىنالىلەردى جاۋاپقا تارتۋ ماقساتىندا حالىقارالىق قۇقىق نورمالارىنا سايكەس وزگە مەملەكەتتەرگە قۇقىقتىق كومەك كورسەتۋ تۋرالى سۇرانىستار جولدايدى.
سونىمەن قاتار، ازەربايجان ازاماتتارىنا قاتىستى جاسالعان قاتىگەز ارەكەتتەرگە بايلانىستى رەسەيمەن بايلانىستى بىرقاتار كونتسەرتتەر مەن مادەني ءىس-شارالار توقتاتىلعان. بۇل تۋرالى اقپاراتتى iTicket.az تاراتتى.
مالىمەتكە سايكەس، كەلەسى ءىس-شارالار توقتاتىلدى:
- Yumor Fest (18.07.2025, Sea Breeze Resort);
- باستا كونتسەرتى (30.08.2025, Sea Breeze Resort);
- «ششەلكۋنچيك» بالەتى (11.10.2025, گەيدار اليەۆ سارايى);
- «اققۋ كولى» بالەتى (11.10.2025, گەيدار اليەۆ سارايى);
- سەرگەي بەزرۋكوۆتىڭ كونتسەرتى (17.10.2025, گەيدار اليەۆ سارايى);
- «رومەو مەن دجۋلەتتا» بالەتى (12.10.2025, گەيدار اليەۆ سارايى);
- «ديۋيموۆوچكا» بالەتى (12.10.2025, گەيدار اليەۆ سارايى);
- ەۆگەني سينياكوۆتىڭ ستەنداپ شوۋى (01.11.2025, وپەرا ستۋدياسى);
- لەونيد اگۋتين مەن انجەليكا ۆارۋمنىڭ كونتسەرتى (23.11.2025, گەيدار اليەۆ سارايى);
- «ماستەر ي مارگاريتا» فلامەنكو-سپەكتاكلى (20.12.2025, وپەرا ستۋدياسى);
- «ششەلكۋنچيك» فلامەنكو-بالەتى (20–21.12.2025, وپەرا ستۋدياسى).
ازەربايجاندا رەسەيدىڭ مەملەكەتتىك جانە جەكەمەنشىك ۇيىمدارى ارقىلى جوسپارلانعان بارلىق مادەني ءىس-شارالار — كونتسەرتتەر، فەستيۆالدەر، سپەكتاكلدەر، كورمەلەر جانە باسقا دا شارالار — توقتاتىلاتىنى تۋرالى ەلدىڭ مادەنيەت مينيسترلىگى مالىمدەدى.
«ەكاتەرينبۋرگ قالاسىندا رەسەي قۇقىق قورعاۋ ورگاندارى تاراپىنان ازەربايجان ۇلتىنا ەتنيكالىق نەگىزدە جاسالعان دەمونستراتيۆتى، ماقساتتى جانە سوتسىز ولتىرۋلەر مەن زورلىق-زومبىلىق اكتىلەرىن، سونداي-اق مۇنداي وقيعالاردىڭ سوڭعى ۋاقىتتا جۇيەلى سيپات الا باستاعانىن ەسكەرە وتىرىپ، رەسەيدىڭ مەملەكەتتىك جانە جەكەمەنشىك ۇيىمدارى ارقىلى ازەربايجاندا وتكىزىلمەك بولعان بارلىق مادەني ءىس-شارالار – كونتسەرتتەر، فەستيۆالدەر، سپەكتاكلدەر، كورمەلەر جانە باسقالار – توقتاتىلادى»، – دەلىنگەن حابارلامادا.
بيلەتتەردى قايتارۋ ءۇشىن ازاماتتارعا ساتۋ ورىندارى مەن ونلاين پلاتفورمالارعا جۇگىنۋگە بولاتىنى اتاپ ءوتىلدى.
كەلىسكەن رەسەي قارجىعا قاۋقارسىز بولىپ شىقتى ما؟ قازاقستان كوكشەتاۋدا ءوز بەتىمەن جەو سالۋعا كىرىستى
