ۋكراينا پرەزيدەنتى ۆلاديمير زەلەنسكي سوڭعى بىرنەشە اپتا ىشىندە ءوزى وتىرعان ۇشاققا رەسەيلىك دروندار ەكى رەت شابۋىل جاساۋعا ارەكەتتەنگەنىن مالىمدەدى. بۇل تۋرالى ول CBS News ارناسىنا بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
زەلەنسكيدىڭ سوزىنشە، العاشقى وقيعا ونىڭ پرەزيدەنتتىك ۇشاعى نورۆەگياعا باعىت العان كەزدە مولدوۆا اۋماعىندا بولعان.
«مولدوۆادا مەنىڭ پرەزيدەنتتىك ۇشاعىم بولدى، سوندىقتان ولار مولدوۆاعا شابۋىل جاسادى»، – دەدى ول.
نورۆەگيا پرەمەر-ءمينيسترى يوناس گار ستيورەنىڭ سوزىنشە، 9 قىركۇيەكتە درون مولدوۆا اۋە كەڭىستىگىندە زەلەنسكيدىڭ ۇشاعىنا ء«سال عانا جەتپەي قالعان».
سونداي-اق زەلەنسكي بۇعان دەيىن جاريا ەتىلمەگەن ەكىنشى وقيعا تۋرالى ايتتى. ونىڭ سوزىنشە، بىرنەشە كۇننەن كەيىن ۇشاعى ۋكرايناعا قايتىپ كەلە جاتقاندا ءبىر نەمەسە ەكى درون مولدوۆا اۋە كەڭىستىگىنە كىرگەن. ۋكراينا پرەزيدەنتى دەلەگاتسياسىنىڭ بارلىق مۇشەسى امان قالعان.
ۋكراينا باسشىسى بۇل وقيعالاردى رەسەيدىڭ ءوزىن جانە باسقا دا شەتەلدىك كوشباسشىلاردى قورقىتۋ ستراتەگياسىنىڭ ءبىر بولىگى دەپ ەسەپتەيدى. بۇعان دەيىن العاشقى وقيعانىڭ ادەيى جاسالعانى نەمەسە كەزدەيسوق بولعانى ناقتى بەلگىسىز ەدى.
سونداي-اق زەلەنسكي رەسەي جەكسەنبى كۇنى ۋكرايناعا بەت العان شەتەلدىك دەلەگاتسيالار وتىرعان پويىزدى ادەيى نىساناعا العان بولۋى مۇمكىن ەكەنىن ايتتى. پويىز جولاۋشىلارى اراسىندا ەۋروپانىڭ جوعارى لاۋازىمدى شەنەۋنىكتەرى مەن اقش ورتالىق بارلاۋ باسقارماسىنىڭ بۇرىنعى ديرەكتورى دەۆيد پەترەۋس بولعان. رەسەيلىك درون شابۋىلىنان كەيىن ولار پولشا شەكاراسىنا جاقىن جەردە ەۆاكۋاتسيالانعان.
«مۇمكىن، ولار وندا امەريكالىقتاردىڭ بولعانىن بىلمەگەن شىعار. ال مۇمكىن، كەرىسىنشە، بىلگەن دە بولار. مەن ولارعا سەنبەيمىن. مەنىڭ ويىمشا، ولار ءبىلدى»، – دەدى زەلەنسكي.
CBS News مالىمەتىنشە، سوڭعى ايلاردا ەۋروپا ەلدەرىنىڭ اۋە كەڭىستىگىنە بەلگىسىز ۇشقىشسىز اپپاراتتاردىڭ ەنۋ جاعدايلارى جيىلەگەن. كەيبىرىنىڭ رەسەيمەن بايلانىسى بولۋى مۇمكىن دەگەن بولجام بار. سەيسەنبى كۇنى ناتو جويعىش ۇشاقتارى العاش رەت ليتۆا اۋە كەڭىستىگىندەگى ۇشقىشسىز اپپاراتتى اتىپ تۇسىرگەن.
