فوتو: Reuters
ماسكەۋ مەرى سەرگەي ءسوبيانيننىڭ مالىمدەۋىنشە، جەكسەنبىگە قاراعان ءتۇنى ۋكراينا رەسەي استاناسىنا بۇرىن-سوڭدى بولماعان اۋقىمدى درون شابۋىلىن جاساعان. ونىڭ ايتۋىنشا، ماسكەۋگە قاراي ۇشقان 450-گە جۋىق دروننىڭ جولى كەسىلگەن. بۇل تۋرالى ۆۆس جازدى، دەپ حابارلايدى “ادىرنا”.
رەسەي قورعانىس مينيسترلىگى ءتۇنى بويى ەلدىڭ ءتۇرلى وڭىرلەرىندە، قارا تەڭىز بەن قىرىم اۋماعىندا 1110 ۋكراينالىق دروننىڭ «ۇستالىپ، جويىلعانىن» حابارلادى.
شابۋىلدان ماسكەۋدەگى كاپوتنيا اۋدانىندا ورنالاسقان ماسكەۋ مۇناي وڭدەۋ زاۋىتىنىڭ اۋماعى زاقىمدانعان. ۋكراينا تاراپى زاۋىتتىڭ مۇناي وڭدەۋ قوندىرعىلارىنىڭ بىرنەشە بولىگىنە سوققى تيگەنىن مالىمدەدى. زاۋىت ماسكەۋ مەن وعان جاقىن وڭىرلەردى جانارمايمەن قامتاماسىز ەتەتىن ماڭىزدى كاسىپورىنداردىڭ ءبىرى سانالادى.
ماسكەۋ وبلىسىنىڭ گۋبەرناتورى اندرەي ۆوروبەۆتىڭ مالىمەتىنشە، وڭىرگە 249 درون شابۋىل جاساعان. رامەنسك وكرۋگىندەگى سوفينو اۋىلىندا درون كوپپاتەرلى ۇيگە ءتۇسىپ، 44 جاستاعى ايەل قازا تاپقان. كەيىن اۋرۋحانادا تاعى ەكى ادام كوز جۇمعان.
شابۋىل سالدارىنان ونداعان تۇرعىن جاراقات العان. اۋرۋحانالاردا 17 ادام ەمدەلىپ جاتقانى، ولاردىڭ اراسىندا ەكى بالانىڭ بار ەكەنى حابارلاندى. ءبىر بالانىڭ جاعدايى اۋىر.
ماسكەۋ وبلىسىنىڭ بىرنەشە اۋدانىندا تۇرعىن ۇيلەر، كولىكتەر جانە باسقا دا نىساندار زاقىمدانىپ، ورتتەر شىققان.
ۋكراينا پرەزيدەنتى ۆلاديمير زەلەنسكي شابۋىل كەزىندە الىس قاشىقتىقتاعى دروندارمەن قاتار ءتۇرلى زىمىراندار قولدانىلعانىن مالىمدەدى. ول ولاردىڭ اراسىندا Pelican جانە «فلامينگو» جۇيەلەرى بولعانىن ايتتى.
ۋكراينالىق BBC قىزمەتىنىڭ مالىمەتىنشە، Pelican اتاۋى Fire Point كومپانياسى ازىرلەگەن FP-7 «پەليكان» بالليستيكالىق زىمىرانىنا قاتىستى بولۋى مۇمكىن. ونىڭ مالىمدەلگەن قاشىقتىعى 200–300 شاقىرىم. الايدا ماسكەۋ بۇل قاشىقتىقتان الىسىراق ورنالاسقاندىقتان، زىمىراننىڭ ناقتى قولدانىلعانى ازىرگە راستالعان جوق.
شابۋىلعا بايلانىستى ماسكەۋ اۋەجايلارىندا ۋاقىتشا شەكتەۋلەر ەنگىزىلىپ، «اەروفلوت» بىرقاتار رەيستەرىن كەيىنگە قالدىردى نەمەسە توقتاتتى. كەيبىر ۇشاقتار قوسالقى اۋەجايلارعا باعىتتالدى.
