تۇركياعا ۇشىپ بارۋ تالاپتارى وزگەردى مە؟

2687
Adyrna.kz Telegram

ماۋسىمنىڭ 20- سى كۇنى قازاقستان تۇركيا اۋە باعىتتارى العاشقى رەيسىن باستادى. ەكى ەل اراسىنداعى اۋە قاتىناستارىنىڭ تالاپتارى مەن شارتتارى قانداي؟ بۇرىنعىداي ەمىن ەركىن ۇشىپ بارىپ قايتۋعا بولا ما؟ الدە كارانتينگە بايلانىستى باسقا دا ەرەجەلەر بار ما؟ بۇل سۇراقتىڭ جاۋابىن سوڭعى ءۇش كۇندە ەكى ەل اراسىندا بارىپ كەلگەن ادامداردىڭ پىكىرىنەن تاباسىز.

«بۇگىن تاڭەرتەڭ 07-30-داعى ءتنۇ (تۇرىك اۋە جولدارى) ۇشاعىمەن الماتىدان ستامبۇلعا كەلدىم.  تىركەلۋ ءۇشىن اۋەجايعا 4 ساعات بۇرىن كەلۋىمىزدى ايتقان. الايدا تىركەلۋ ادەتتەگىدەي ۇشۋ ۋاقىتىنان 2 ساعات بۇرىن اشىلدى. تىركەۋ الاڭىندا كارانتين تالاپتارىن ورىنداۋ ساقتالعانىمەن، شىعۋ ەسىگىندە بۇل تالاپتى ساقتاۋ مۇمكىن بولمادى. ۇشاققا كىرەردە دەنە قىزۋىمىز ولشەندى. دەسەك تە، ۇشاقتىڭ ىشىندە اراقاشىقتىقتى ساقتاۋ تالاپتارى بولمادى، ۇشاقتىڭ ءىشى جولاۋشىعا لىق تولى.

ءبىر جارىم ساعاتقا كەشىگىپ ۇشتىق. ۇشاقتا سۋ، شىرىن جانە قاپتاماعا ورالعان ءتاتتى ءبالىش پەن سەندۆيچ بەردى. باسقا تاماق بەرىلمەدى. تازالىق، گيگيەنالىق زاتتار مەن جامىلعى بەرىلدى.  سونىمەن قاتار ۇشاقتا انكەتا تولتىردىق. وسى انكەتانى ستامبۇلداعى پاسپورتتى تەكسەرۋشى قىزمەتكەرگە وتكىزدىك. ستامبۇلدا دا دەنە قىزۋىمىز ولشەندى. مىنە، وسىلايشا تۇركياعا كەلىپ جەتتىك» دەپ جازادى Facebook –تاعى Benim Yarım Türk  توبىندا  Başak Suslu.

ءدال وسىعان ۇقساس جاعدايدى ءۇش كۇننەن بەرى ەكى ەل اراسىندا بارىس كەلىس جاساعان باسقا دا جولاۋشىلار جارىسا جازۋدا. ءبىز حابارلاسقان الماتىلىق ەرجان قاساباي دا ستامبۇلعا ەشبىر كەدەرگىسىز جەتكەنىن ايتتى. «بۇعان دەيىن حابارلانعانىنداي، اۋەجايلاردا كارانتيننىڭ قاتاڭ تالاپتارى ساقتالىپ، شەتەلدەن كەلگەندەر ءجىتى باقىلاۋعا الىنادى، قاتاڭ تەكسەرىلەدى دەگەن نارسەلەر بولمادى. ۇشاقتان تۇسكەن سوڭ كارانتينگە وقشاۋلاندىرىلادى دەگەن دە بوس ءسوز ەكەن.

ەشكىمدى وقشاۋلاپ، كارانتينگە الىپ جاتقان جوق. سونىمەن قاتار كوروناۆيرۋسقا تەست تاپسىرتادى دەگەن ەدى، قازاقتىڭ دا، تۇرىكتىڭ دە اۋەجايىندا ەشقانداي تەست جاسالمادى. بار بولعانى دەنە قىزۋىمىزدى ولشەدى دە، جىبەردى» دەگەن ەرجان ەكى ەل اراسىنداعى ۇشىپ بارۋ كەلۋدە اناۋ ايتقان جاڭالىق جوعىن، ءبارى بۇرىنعىسىنشا ەكەنىن جەتكىزدى.

تۇركيادان ەلگە كەلگەن جانار ايدارقىزى دا ەش قيىندىقسىز، ادەتتەگىدەي جەتكەنىن مالىمدەدى. «تۇرىك اۋەجايىندا ءبىر ەرەكشەلىگى انتيسەپتيك قۇرىلعىلارى كوپتەپ قويىلعان. كەز كەلگەن ادام پايدالانا بەرەدى، تەگىن. بالكىم، بارلىق شەكارا اشىلماعان سوڭ بولار، اۋەجايدا بۇرىنعىداي ىعى جىعى ادام جوق. دەسەك تە، كەلىپ، كەتىپ جاتقاندار از ەمەس. تۇرىك ۇشاعىندا كوروناۆيرۋستان ساقتانۋ شارالارى تۋرالى ۇزدىكسىز حابارلانىپ، انكەتا تولتىرۋدى سۇرادى.

انكەتا اعىلشىن جانە تۇرىك تىلىندە. ۇشاققا مىنەردە اراقاشىقتىقتى ساقتاۋ تالاپتارى ورىندالدى. الايدا ۇشاق ءىشى جولاۋشىعا لىق تولى بولدى. الماتىعا جەتكەنىمىزدە دە دەنە قىزۋىمىز ولشەندى. وكىنىشكە قاراي، تەكسەرۋ بەكەتىنەن ءوتۋ كوپ ۋاقىتتى الدى. تار بولمەدە جولاۋشىلار توپىرلاپ، ءبىر بىرىمىزگە جاقىن تۇردىق.  ەشقانداي تەست جاسالمادى، ەشقانداي انىقتاما سۇرالمادى» دەيدى جانار.

ايجان قۇرمانباي، "ادىرنا" ۇلتتىق پورتالى

پىكىرلەر