شاكىر كەيكين اتىراۋ قالاسىنىڭ اكىمى قىزمەتىنەن ءوز ەركىمەن بوساتىلدى. بۇل اقپاراتتى اتىراۋ وبلىسى اكىمدىگىنىڭ ءباسپاسوز قىزمەتى راستادى، دەپ حابارلايدى “ادىرنا”.
ء"وز ەركىمەن قىزمەتىنەن بوساتىلدى", - دەپ ناقتىلادى ءباسپاسوز قىزمەتى.
شاكىر كەيكين اتىراۋ قالاسىنىڭ اكىمى قىزمەتىنە 2023 جىلعى 10 شىلدەدە تاعايىندالعان ەدى. قازىرگى تاڭدا قالا اكىمىنىڭ ورنىنا كىم كەلەتىنى ازىرگە بەلگىسىز.
شاكىر كەيكين 1970 جىلى اتىراۋ وبلىسىنىڭ جىلىوي اۋدانىندا دۇنيەگە كەلگەن. 1993 جىلى قازاق پوليتەحنيكالىق ينستيتۋتىن "تاۋ-كەن ينجەنەرى" ماماندىعى بويىنشا بىتىرگەن.
ەڭبەك جولىن 1993 جىلى قۇلسارى قالاسىنداعى "تەڭىزمۇنايكومپلەكت" جشس كوممەرتسيالىق ءبولىمىنىڭ بروكەرى بولىپ باستاعان. مەملەكەتتىك قىزمەتتە 2008 جىلدان بەرى جۇمىس ىستەپ كەلەدى.
ءار جىلدارى قوسشاعىل اۋىلدىق وكرۋگىنىڭ اكىمى، قۇلسارى قالاسىنىڭ اكىمى، اتىراۋ قالالىق تۇكش، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى، اتىراۋ قالاسى اكىمىنىڭ ورىنباسارى قىزمەتتەرىن اتقاردى.
2019 جىلدىڭ قىركۇيەگىنەن 2022 جىلدىڭ ناۋرىزىنا دەيىن ماقات اۋدانىنىڭ اكىمى بولدى.
اتىراۋ اكىمى بولىپ تاعايىندالعانعا دەيىن ساۋدا جانە ينتەگراتسيا مينيسترلىگى ساۋدا دەپارتامەنتىنىڭ باسشىسى بولىپ جۇمىس ىستەدى.
بۇعان دەيىن ۇلتتىق قاۋىپسىزدىك كوميتەتى تىلەك ماحۋوۆقا قاتىستى سوتقا دەيىنگى تەرگەۋ جۇرگىزىلىپ جاتقانىن راستاعان. باق پەن Telegram-ارنالاردا ونىڭ ۇستالعانى جانە پارا الدى دەگەن كۇدىككە ىلىنگەنى تۋرالى اقپارات تاراعان. الايدا ۇقك تەرگەۋدىڭ ءمان-جايىن جاريالامادى.
ماحۋوۆ ۇستالعاننان كەيىن شاكىر كەيكيننىڭ كوپشىلىك الدىنا سيرەك شىعۋى تۇرعىنداردىڭ نازارىن اۋدارعان. سول كەزدە قالا اكىمدىگىنىڭ ءباسپاسوز قىزمەتى اكىمنىڭ ەڭبەككە جارامسىزدىق بويىنشا دەمالىستا ەكەنىن حابارلاعان بولاتىن.
