قايىرىمدىلىققا بولىنگەن ميللياردتاردى جىمقىردى دەگەن پەريزات قايراتتىڭ ىسىنە بايلانىستى سوت وتىرىسى ءوتىپ جاتىر. بۇل جولى گازا حالقىنا گۋمانيتارلىق كومەك كورسەتۋگە قاتىستى ەپيزود قارالۋدا، دەپ حابارلايدى “ادىرنا”.
ىستە جابىرلەنۋشى رەتىندە تانىلعان «اسار-ۋمە» قايىرىمدىلىق قورىنىڭ پرەزيدەنتى اسحات نۇرماشەۆ سوتتا ەكى تاراپتىڭ اراسىنداعى ارىپتەستىككە بايلانىستى جايتتاردى باياندادى.
بەلگىلى بولعانداي، «اسار-ۋمە» قورى «BizBirgemiz Kazakhstan 2030» قورىنا 200 ميلليون تەڭگە اۋدارعان.
اسحات نۇرماشەۆتىڭ ايتۋىنشا، بۇل باستاما 2023 جىلدىڭ قاراشاسىندا، ياعني تاياۋ شىعىستاعى جاعداي ۋشىعا تۇسكەننەن كەيىن پايدا بولعان. سول كەزدە الەۋمەتتىك جەلىلەر مەن بۇقارالىق اقپارات قۇرالدارىندا پەريزات قايرات باسقاراتىن قوردىڭ پالەستينا ەلشىلىگىمەن ارىپتەستىك ورناتقانى جانە ابۋ-دابيدەگى حالىقارالىق گۋمانيتارلىق حابقا قول جەتكىزە الاتىنى تۋرالى اقپارات تاراعان. كەيىن بۇل مالىمەتتى پەريزات قايراتتىڭ ءوزى «اسار-ۋمە» وكىلدەرىمەن كەزدەسۋدە راستاعان.
ء«بىز ابۋ-دابيگە بىرگە باردىق. حالىقارالىق گۋمانيتارلىق جۇك تيەلەتىن قويمانى ارالاپ كوردىك. بۇل – الماتىداعى قويما ەمەس، وعان اككرەديتاتسياسىز كىرۋ مۇمكىن ەمەس. بىزگە بۇرىن ساتىپ الىنعان جۇكتەردىڭ سول جەردە تۇرعانىن كورسەتتى»، – دەدى نۇرماشەۆ سوت وتىرىسىندا.
الايدا ونىڭ ايتۋىنشا، بۇل جۇكتىڭ بارىن راستايتىن ەشقانداي رەسمي قۇجات ۇسىنىلماعان. بارلىق اقپارات تەك پەريزات قايراتتىڭ سوزىنە نەگىزدەلگەن.
نۇرماشەۆتىڭ مالىمەتىنشە، ابۋ-دابيگە ساپاردان جانە استانادا ءباا مەن پالەستينا ەلشىلىكتەرى ۇيىمداستىرعان شارالارعا قاتىسقاننان كەيىن، ونىڭ قورى گازا سەكتورىنا ارناپ قاراجات جيناۋدى باستاعان. بار بولعانى بەس كۇننىڭ ىشىندە قازاقستاندىقتار 293 ميلليون تەڭگە قايىرىمدىلىق جاساعان.
ء«بىز بۇل سومانى ترانشپەن، ياعني ءار جولى 50 ميلليون تەڭگەدەن اۋدارۋدى جوسپارلادىق. بىراق پەريزات بارلىق اقشانى بىردەن اۋدارۋدى تالاپ ەتتى. اقىلداسا كەلە، ءبىز 200 ميلليون تەڭگەنى جىبەردىك. قالعان 93 ميلليون تەڭگە تەك ەسەپ-قيساپ ۇسىنىلعاننان كەيىن اۋدارىلادى دەپ كەلىستىك»، – دەدى جابىرلەنۋشى تاراپ.
ونىڭ ايتۋىنشا، ەكى قور اراسىندا قايىرىمدىلىق باعىتىنداعى ارىپتەستىك تۋرالى كەلىسىم جاسالعان. الايدا، قارجى اۋدارىلعان كەزدە دە، ودان كەيىن دە ەشقانداي ەسەپ بەرىلمەگەن.
پروكۋروردىڭ «ابۋ-دابيدەگى قويمادان «BizBirgemiz» قورىنىڭ لوگوتيپى بار جۇك قوراپتارىن كوردىڭىز بە؟» دەگەن سۇراعىنا نۇرماشەۆ تەرىس جاۋاپ بەردى. ول سونداي-اق، ول جەردەن پەريزات قايراتتان باسقا قور وكىلدەرىن كورمەگەنىن اتاپ ءوتتى.
«پەريزات قايرات ساتىپ الدى دەگەن تاۋارلارعا قاتىستى دا بىردە-ءبىر قۇجات ۇسىنىلعان جوق. بارلىعى تەك ونىڭ سوزىنە سۇيەنىپ جۇزەگە استى»، – دەپ قوستى ول.
نۇرماشەۆتىڭ سوزىنشە، ابۋ-دابيگە ساپار شىعىندارىن پەريزات قايراتتىڭ ءوزى كوتەرگەن.
كەيىن ول قور تاراپىنان ۇسىنىلعان بارلىق قۇجاتتىڭ جالعان ەكەنىن بىلگەنىن ايتتى.
