وزبەكستاننىڭ ىشكى ىستەر مينيسترلىگى شەتەلدىك تۋريستەر مەن ەلگە كەلەتىن وزگە دە قوناقتارعا جەكە كۇزەت قىزمەتىن ۇسىنۋدى قاراستىرىپ جاتىر، دەپ حابارلايدى "ادىرنا" ءتىلشىسى.
بۇل باستاما 9 قىركۇيەكتە تاشكەنت قالاسى قورعاۋ قىزمەتىندە وتكەن كەزدەسۋدە تالقىلاندى. جيىنعا ءىىم قورعاۋ دەپارتامەنتىنىڭ باستىعى، پولكوۆنيك قوبيل شوديبەكوۆ جانە تۋريزم كوميتەتى توراعاسىنىڭ ورىنباسارى سۋحروبجون بوبوكالونوۆ قاتىستى.
ۆەدومستۆو مالىمەتىنشە، جەكە كۇزەت قىزمەتىن شەتەلدىك تۋريستەرگە، رەسمي دەلەگاتسيالارعا، كاسىپكەرلەرگە جانە ەلگە كەلگەن باسقا دا قوناقتارعا ۇسىنۋ جوسپارلانعان.
قىزمەت اياسىندا ساپار باعىتى بويىنشا ىقتيمال قاۋىپتەر الدىن الا باعالانىپ، قاۋىپسىزدىك شارالارى ۇيىمداستىرىلادى. توتەنشە جاعداي بولعان جاعدايدا جەدەل ارەكەت ەتۋ تەتىكتەرى دە قاراستىرىلماق.
سونىمەن قاتار تۋريستىك نىسانداردا زاماناۋي بەينەباقىلاۋ جۇيەلەرى مەن تەحنيكالىق قۇرالداردى كەڭىنەن پايدالانۋ، جەدەل ارەكەت ەتۋ توپتارىنىڭ جۇمىسىن كۇشەيتۋ ماسەلەلەرى قارالدى.
ءىىم باستامانى ەلدەگى ءتۋريزمنىڭ قارقىندى دامۋىمەن، شەتەلدىك تۋريستەر سانىنىڭ ارتۋىمەن جانە تۋريستىك باعىتتاردىڭ كەڭەيۋىمەن بايلانىستىرىپ وتىر.
جوسپار بويىنشا قاۋىپسىزدىك شارالارى ءتۋريستىڭ ەلگە كەلگەن ساتىنەن باستاپ ساپارى اياقتالعانعا دەيىن قامتاماسىز ەتىلۋى ءتيىس. بۇل ءۇشىن تۋريستىك باعىتتارداعى قاۋىپ-قاتەرلەردى تالداۋ، تاريحي-مادەني نىسانداردى، قوناقۇيلەردى، دەمالىس ورىندارىن جانە تۋريستەر كوپ جينالاتىن اۋماقتاردى زەرتتەۋ ۇسىنىلدى.
قازىر قىزمەتتىڭ قۇنى، تاپسىرىس بەرۋ ءتارتىبى مەن ونى ىسكە قوسۋ مەرزىمى ناقتى بەلگىلەنگەن جوق.
