رەسەي قازاقستان جانە وزبەكستانمەن اتوم ەنەرگەتيكاسى سالاسىندا ءوزارا قۇرمەت پەن تەڭ ارىپتەستىك قاعيداتىنا سۇيەنە وتىرىپ جۇمىس ىستەيتىنى تۋرالى ايتتى، دەپ حابارلايدى "ادىرنا" ۇلتتىق پورتالى.
بۇل تۋرالى رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا مالىمدەدى.
ونىڭ ايتۋىنشا، رەسەي ورتالىق ازيا ەلدەرىمەن ىنتىماقتاستىقتى حالىقارالىق قۇقىق پەن ەكىجاقتى كەلىسىمدەر نەگىزىندە دامىتىپ كەلەدى.
ء«بىز باتىس ەلدەرىنىڭ ورتالىق ازيا نارىعىنا، سونىڭ ىشىندە تابيعي رەسۋرستارعا قول جەتكىزۋ ءۇشىن ءتۇرلى ارەكەتتەر جاساپ جاتقانىن كورىپ وتىرمىز. كەي جاعدايدا ولار نارىقتىق ەمەس تاسىلدەردى قولدانادى جانە ءوڭىر ەلدەرىمەن ءبىزدىڭ ىنتىماقتاستىققا سىزات تۇسىرۋگە تىرىسادى»، – دەدى زاحاروۆا.
رەسەي ءسىم وكىلى ماسكەۋ قازاقستان مەن وزبەكستانداعى اتوم ەنەرگەتيكاسىن دامىتۋ جوبالارىن ءوزارا قۇرمەت پەن تەڭدىك نەگىزىندە جۇزەگە اسىرىپ جاتقانىن اتاپ ءوتتى.
بۇل مالىمدەمە فرانتسيا پرەزيدەنتى ەممانۋەل ماكرون ۋران جەتكىزىلىمىندە رەسەيگە تاۋەلدىلىكتى ازايتۋ قاجەتتىگى تۋرالى ايتقان سوزىنەن كەيىن جاسالدى. ماكرون بالاما جەتكىزۋشىلەر رەتىندە قازاقستان، وزبەكستان، موڭعوليا، كانادا جانە اۆستراليانى اتاعان.
زاحاروۆا ءوز كەزەگىندە باتىس ەلدەرى «دومينانتتىق، ءتىپتى وتارشىلدىق سيپاتتاعى ۇستانىممەن ارەكەت ەتەدى» دەپ سىنعا الدى.
