وزبەكستان مەن ازەربايجان كاسپي تەڭىزىندە بىرلەسكەن فلوت قۇرۋدى جوسپارلاپ وتىر. بۇل تۋرالى وزبەكستاننىڭ ينۆەستيتسيالار، ونەركاسىپ جانە ساۋدا ءمينيسترىنىڭ ورىنباسارى حۋررام تەشاباەۆ Report اگەنتتىگىنە بەرگەن سۇحباتىندا مالىمدەدى، دەپ حابارلايدى «ادىرنا» ءتىلشىسى.
ونىڭ ايتۋىنشا، كاسپي تەڭىزىندە بىرلەسكەن فلوت قۇرۋ جانە «ۋزتەميريۋلكارگو» كومپانياسى مەن ازەربايجاننىڭ كاسپي تەڭىز كەمە قاتىناسى ۇيىمى اراسىندا بىرلەسكەن كاسىپورىن اشۋ كوزدەلۋدە. مۇنداي قادامدار جۇك تاسىمالىن تيىمدىرەك، تۇراقتىراق ءارى ەكسپورتتاۋشىلار ءۇشىن اناعۇرلىم ءتيىمدى ەتۋگە مۇمكىندىك بەرمەك.
تاراپتار سونداي-اق ورتا ءدالىزدىڭ باسەكەگە قابىلەتتىلىگىن ارتتىرۋ باعىتىندا جۇمىس جۇرگىزىپ جاتىر. قازىرگى ۋاقىتتا جۇكتەردى تيەپ-ءتۇسىرۋ قىزمەتتەرىنە جەڭىلدىكتەر بەرۋ، قولايلى تاريفتەر ەنگىزۋ جانە جۇكتەرگە باسىمدىقپەن قىزمەت كورسەتۋ ماسەلەلەرى تالقىلانۋدا.
حۋررام تەشاباەۆتىڭ سوزىنشە، باكۋ حالىقارالىق تەڭىز پورتى بۇگىندە ورتا ءدالىز ارقىلى وزبەك ونىمدەرىنىڭ سىرتقى نارىقتارعا شىعۋىن قامتاماسىز ەتۋدە ماڭىزدى ءرول اتقارادى جانە ءوڭىردىڭ ترانزيتتىك الەۋەتىن دامىتۋداعى ستراتەگيالىق لوگيستيكالىق توراپتاردىڭ ءبىرى سانالادى.
«وزبەك ەكسپورتتاۋشىلارى پورت ينفراقۇرىلىمىن ءتيىمدى پايدالانىپ كەلەدى. سوڭعى جىلدارى بۇل باعىتتاعى جۇك تاسىمالى كولەمى تۇراقتى ءوسىپ، ەكسپورتتالاتىن ءونىم تۇرلەرى كوبەيىپ، ەكى ەلدىڭ كولىك-لوگيستيكا وپەراتورلارى اراسىنداعى ىنتىماقتاستىق نىعايدى»، – دەدى ءمينيستردىڭ ورىنباسارى.
