قۇرىلتاي دەپۋتاتتارى زاڭ جوبالارىن ءوز باستاماسىمەن ۇسىنا الادى. بۇل رەتتە ۇكىمەتتىڭ قورىتىندىسىن الۋ تالاپ ەتىلمەيدى، دەپ حابارلايدى "ادىرنا" ءتىلشىسى.
بۇل تۋرالى قۇرىلتاي دەپۋتاتى سنەجاننا يماشەۆا مالىمدەدى.
ونىڭ ايتۋىنشا، ۇكىمەت زاڭ جوباسىن ەنگىزگەن جاعدايدا وعان ۇكىمەتتىڭ قورىتىندىسى قوسا بەرىلۋى كەرەك. ال دەپۋتاتتىق باستاماعا مۇنداي تالاپ قويىلمايدى.
دەپۋتات ءوز تۇزەتۋلەرىن ازىرلەگەن كەزدە ولاردىڭ بيۋدجەتكە ىقپالىن ەسكەرۋى قاجەت. ەگەر ۇسىنىلعان وزگەرىستەر قوسىمشا شىعىنداردى تالاپ ەتپەسە نەمەسە بيۋدجەت شىعىستارىن قىسقارتپاسا، ۇكىمەتتىڭ قورىتىندىسىن الۋ مىندەتتى ەمەس.
سونىمەن قاتار دەپۋتاتتار ءوز ۇسىنىستارىنىڭ ىقتيمال سالدارىن باعالاۋ ءۇشىن ۇكىمەتتەن قورىتىندى سۇراتا الادى. مىسالى، كاسىپكەرلەرگە قويىلاتىن تالاپتاردى كۇشەيتۋ، جاڭا مىندەتتەر نەمەسە ايىپپۇلدار ەنگىزۋ جوسپارلانسا، مۇنداي قورىتىندى وزگەرىستەردىڭ سالدارىن باعالاۋعا مۇمكىندىك بەرەدى.
بۇعان دەيىن قۇرىلتايدىڭ جاڭا رەگلامەنتى قابىلدانعان. قۇجات قازاقستاننىڭ جاڭا كونستيتۋتسياسى مەن «قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭ نورمالارىنا سايكەس ازىرلەنگەن. قۇرىلتاي زاڭ جوبالارىن حالىقارالىق شارتتاردى راتيفيكاتسيالاۋ نەمەسە دەنونساتسيالاۋ تۋرالى زاڭداردى قوسپاعاندا، ءۇش وقىلىمدا قارايدى.
