قازاقستان مۇسىلماندارى ءدىني باسقارماسى وقۋشى قىزدارعا ورامال تاعۋعا مۇمكىندىك بەرەتىن جەكەمەنشىك مەكتەپتەرگە قاتىستى قاتاڭ شارالار قولدانۋعا قارسى ەكەنىن مالىمدەدى، دەپ حابارلايدى «ادىرنا» ءتىلشىسى.
قمدب سوڭعى كۇندەرى قوعامدا مەكتەپ وقۋشىلارىنىڭ ورامال تاعۋ ماسەلەسى قايتادان قىزۋ تالقىلانىپ جاتقانىن اتاپ ءوتتى. بۇعان وقۋ-اعارتۋ ءمينيسترىنىڭ مەكتەپ فورماسىنا قويىلاتىن تالاپتاردى ساقتاۋ تۋرالى مالىمدەمەسىنە قاتىستى باق-تا تاراعان اقپارات سەبەپ بولعان. اتاپ ايتقاندا، مەكتەپ فورماسىنا قويىلاتىن تالاپتاردى بۇزعان، سونىڭ ىشىندە وقۋشى قىزدارعا ورامال تاعۋعا رۇقسات بەرگەن جەكەمەنشىك ءبىلىم بەرۋ ۇيىمدارى ليتسەنزياسىنان ايىرىلۋى مۇمكىن ەكەنى ايتىلعان.
«يسلام شاريعاتى بويىنشا باليعات جاسىنا جەتكەن مۇسىلمان قىزعا ورامال تاعۋ – پارىز. بۇل ماسەلەدەگى ءدىني ۇكىم وزگەرمەيدى. قمدب بۇعان دەيىن دە وسى ۇستانىمدى بىرنەشە رەت اشىق ءبىلدىرىپ، مەكتەپ جاسىنداعى قىزداردىڭ ءبىلىم الۋىنا كەدەرگى كەلتىرمەي، ءدىني مىندەتىن ورىنداۋىنا مۇمكىندىك بەرەتىن وڭتايلى شەشىم قابىلداۋ جونىندە ءتيىستى مەملەكەتتىك ورگاندارعا ۇسىنىستارىن جەتكىزگەن. اتاپ ايتقاندا، مەكتەپ فورماسىنىڭ جالپى ۇلگىسى مەن تۇسىنە ۇيلەسەتىن ورامالعا رۇقسات بەرۋ ۇسىنىلعان»، – دەلىنگەن حابارلامادا.
باسقارما زايىرلى مەملەكەت ۇعىمى ءدىندى جوققا شىعارۋ نەمەسە ازاماتتاردىڭ ءدىني سەنىمدەرىن شەكتەۋ دەگەندى بىلدىرمەيتىنىن دە اتاپ ءوتتى.
قمدب پىكىرىنشە، قوعامدا كوپ جىلدان بەرى تالقىلانىپ كەلە جاتقان بۇل ماسەلەنى تەك تىيىم سالۋ جانە اكىمشىلىك شارالار ارقىلى شەشۋ مۇمكىن ەمەس. كەرىسىنشە، مۇنداي قادامدار قوعامدىق تۇسىنىسپەۋشىلىكتى كۇشەيتۋى ىقتيمال. وسىعان بايلانىستى باسقارما وقۋ-اعارتۋ مينيسترلىگى مەن وزگە دە ۋاكىلەتتى مەملەكەتتىك ورگاندارعا مەكتەپ فورماسىنىڭ تالاپتارىن ساقتاي وتىرىپ، كامەلەتكە تولعان مۇسىلمان قىزداردىڭ ورامال تاعۋىنا مۇمكىندىك بەرەتىن ناقتى قۇقىقتىق تەتىك ازىرلەۋدى ۇسىندى.
الايدا كەيىننەن قمدب-نىڭ بۇل مالىمدەمەسى ءوشىرىلدى. بىراق بۇل الەۋمەتتىك جەلىدەگى حيدجاب داۋىن ودان سايىن قىزدىرا ءتۇستى. داۋلاسقاندار حيدجابتان اسىپ، باسقا دا ءدىني ۇكىمدەردى تالقىعا ۇسىنىپ جاتىر. ءبىرى قولداپ، ءبىرى قارسى بولىپ، ءبىر-بىرىنە بالاعات ايتىپ، قارعىس ارناپ جاتقاندار دا كەزدەسەدى.
