وقۋ-اعارتۋ ءمينيسترى جۇلدىز سۇلەيمەنوۆا اباي وبلىسىنا جۇمىس ساپارى اياسىندا وڭىردەگى ءۇش اۋدان - بەسقاراعاي، اياگوز، جارما اۋداندارىنىڭ شالعايداعى اۋىلدارىندا ورنالاسقان ءبىلىم بەرۋ ۇيىمدارىن ارالادى، دەپ حابارلايدى "ادىرنا" ءتىلشىسى مينيسترلىكتىڭ ءباسپاسوز قىزمەتىنە سىلتەمە جاساپ.
ءوڭىر باسشىسى بەرىك ۋاليمەن بىرگە اياگوز قالاسىندا«كەلەشەك مەكتەپتەرى» ۇلتتىق جوباسى اياسىندا سالىنعان زاماناۋي ۇلگىدەگى 600 ورىندىق جاڭا مەكتەپتىڭ اشىلۋ راسىمىنە قاتىستى.
قالا تۇرعىندارىن جاڭا مەكتەپتىڭ اشىلۋىمەن قۇتتىقتاعان مينيستر ەلىمىزدە مەملەكەت باسشىسىنىڭ باستاماسىمەن ءبىلىم ساپاسىن ارتتىرۋعا باعىتتالعان ينفراقۇرىلىمدىق جاڭعىرتۋ جۇمىستارى كەشەندى تۇردە جۇزەگە اسىرىلىپ كەلە جاتقانىن اتاپ ءوتتى.
«كەلەشەك مەكتەپتەرى» ۇلتتىق جوباسى اياسىندا ەلىمىزدە بالالارعا قاۋىپسىز ءارى قولايلى جاعداي جاسالعان يننوۆاتسيالىق وقۋ ورىندارىنىڭ جاڭا جەلىسى قۇرىلدى. اباي وبلىسىندا بيىل حالىقارالىق ءبىلىم سايىستارىنا قاتىسقان 18 وقۋشىنىڭ 14-ءى جۇلدەلى ورىندارعا يە بولدى. بۇل ۇلت زيالىلارى دۇنيەگە كەلگەن مەكەندە عاسىرلار بويى قالىپتاسقان زياتكەرلىك الەۋەتتىڭ ساقتالعانىنىڭ ايقىن دالەلى»،- دەدى وقۋ-اعارتۋ ءمينيسترى جۇلدىز سۇلەيمەنوۆا.
وڭىردە بۇگىنگى كۇنى 4-ءشى كەلەشەك مەكتەبى پايدالانۋعا بەرىلدى، سونداي-اق ءبىر مەكتەپتىڭ قۇرىلىسى جۇرگىزىلۋدە، بيىل 9 مەكتەپ زاماناۋي ستاندارتتارعا سايكەستەندىرىلىپ، رەنوۆاتسيادان ءوتتى، 2026 جىلى 26 مەكتەپكە كۇردەلى جوندەۋ جۇرگىزىلەدى.
«بۇل مەكتەپ اياگوز قالاسىنداعى مەكتەپ تاپشىلىعى ماسەلەسىن شەشۋگە سەپتىگىن تيگىزەدى. شەتكەرى اۋدان تۇرعىندارىنا ارنالعان، بارلىق جاعداي جاسالعان زاماناۋي ءبىلىم ورداسى»، - دەدى ءوڭىر باسشىسى بەرىك ءۋالي.
سونىمەن قاتار مينيستر ءوڭىردىڭ شالعاي اۋىلدارىنداعى
مەكتەپتەردە بولىپ، پەداگوگيكالىق ۇجىمداردىڭ اۋىلداردا ءبىلىم ساپاسىن ارتتىرۋ، بالالارعا قولايلى جاعداي جاساۋ جونىندەگى ۇسىنىس-تىلەكتەرىن تىڭدادى. بەسقاراعاي اۋدانىنداعى باشكول نەگىزگى مەكتەبىندە 40 وقۋشى ءبىلىم الۋدا، مەكتەپتە 18 پەداگوگ قىزمەت ەتەدى. ايتا كەتۋ كەرەك، اباي وبلىسىندا 311 مەكتەپتىڭ 166-سى — شاعىن جيناقتى مەكتەپتەر.
سونىمەن قاتار مينيستر وسى اۋداننىڭ سۋىقبۇلاق اۋىلىندا اپاتتى دەپ تانىلعان مەكتەپتىڭ ورنىنا سالىنىپ جاتقان جاڭا مەكتەپتىڭ قۇرىلىسىمەن تانىستى. 100 وقۋشىعا ارنالعان ءبىلىم ورداسى 2026 جىلى پايدالانۋعا بەرىلەدى. عيمارات «كەلەشەك مەكتەپتەرىنىڭ» ارحيتەكتۋرالىق جوباسىنىڭ ۇلگىسىندە سالىنۋدا. ايتا كەتۋ كەرەك، بۇل اۋىلدا بىرنەشە جىلدان بەرى باستاۋىش سىنىپ وقۋشىلارى ەسكى عيماراتتا ءبىلىم الۋعا ءماجبۇر، ال 5-11 سىنىپتىڭ وقۋشىلارى كورشى اۋىلعا اۆتوبۋسپەن تاسىمالدانادى.
وڭىرلەرگە ساپارىندا وقۋ-اعارتۋ ءمينيسترى ينكليۋزيۆتى جانە ارنايى ءبىلىم بەرۋدىڭ ساپالى ۇيىمداستىرىلۋىنا ەرەكشە كوڭىل بولەدى. جۇلدىز سۇلەيمەنوۆا سەمەي قالاسىنداعى №9 «ايگولەك» بوبەكجايىندا بولدى. مۇندا ەرەكشە ءبىلىم بەرۋدى قاجەت ەتەتىن بالالار ءۇشىن رەسۋرستىق ينكليۋزيۆتى كابينەت، لوگوپەد جانە ۇلتتىق قۇندىلىقتار كابينەتتەرى، سپورت جانە مۋزىكا زالدارى جاساقتالعان.
ەكى كۇندە وبلىستىڭ ءۇش اۋدانىنداعى ءبىلىم نىساندارىنىڭ جاعدايىمەن تانىسقان وقۋ-اعارتۋ ءمينيسترى جۇلدىز سۇلەيمەنوۆا ءبىلىم باسقارماسى مەن اۋماقتىق ءبىلىم ساپاسىن قامتاماسىز ەتۋ دەپارتامەنتىنىڭ باسشىلارىنا وڭىردەگى ءبىلىم بەرۋ ينفراقۇرىلىمىن جاڭعىرتۋ، پەداگوگتەردىڭ مارتەبەسىن كوتەرۋ، بالالارعا ساپالى ءبىلىم الۋعا بارىنشا قولايلى جاعداي جاساۋ جانە قاۋىپسىزدىكتەرىن قامتاماسىز ەتۋدى كۇشەيتۋ جونىندە تاپسىرمالار جۇكتەدى.
