پرەزيدەنت قاسىم-جومارت توقاەۆ سينحۋا اگەنتتىگىنە بەرگەن ەكسكليۋزيۆتى سۇحباتىندا تسيفرلاندىرۋ، جاساندى ينتەللەكت جانە جاڭا تەحنولوگيالار سالاسىنداعى قازاق-قىتاي ىنتىماقتاستىعىنىڭ كەلەشەگى تۋرالى ايتتى، دەپ حابارلايدى «ادىرنا» ءتىلشىسى.
مەملەكەت باسشىسى الەمنىڭ جاڭا تەحنولوگيالىق كەزەڭگە قادام باسىپ وتىرعانىن اتاپ ءوتتى.
«جاساندى ينتەللەكت، روبوتوتەحنيكا جانە اۆتوماتتاندىرۋ جەكەلەگەن سالالاردى عانا ەمەس، تۇتاس ەكونوميكالىق دامۋ مودەلىن وزگەرتىپ جاتىر»، – دەدى پرەزيدەنت.
قاسىم-جومارت توقاەۆ قازاقستاندا 2026 جىل تسيفرلاندىرۋ جانە جاساندى ينتەللەكت جىلى بولىپ جاريالانعانىن، سونداي-اق جاساندى ينتەللەكت جانە تسيفرلىق دامۋ مينيسترلىگى قۇرىلعانىن اتاپ ءوتتى. بۇدان بولەك، ەلدە «Digital Qazaqstan» جالپىۇلتتىق ستراتەگياسى بەكىتىلگەن.
پرەزيدەنتتىڭ سوزىنشە، قازاقستان تسيفرلىق ترانسفورماتسيانى ەكونوميكانى جانە قوعامدىق ءومىردىڭ بارلىق سالاسىن جاڭعىرتۋدىڭ نەگىزگى قۇرالى رەتىندە قاراستىرادى.
«سوندىقتان تسيفرلاندىرۋ سالاسىندا قىتايمەن ىنتىماقتاستىق ورناتۋ ەلىمىز ءۇشىن اسا ماڭىزدى. ءسىزدىڭ ەلىڭىز قۋاتتى تەحنولوگيالىق ەكوجۇيە قالىپتاستىرىپ، جاساندى ينتەللەكت، روبوتوتەحنيكا، ەلەكتروندى كوممەرتسيا جانە باسقا دا باعىتتار بويىنشا ايتارلىقتاي جەتىستىكتەرگە جەتتى»، – دەدى ول.
مەملەكەت باسشىسى ەكى ەل اراسىنداعى تەحنولوگيالىق ارىپتەستىكتىڭ الەۋەتى جوعارى ەكەنىن ايتتى. ونىڭ پىكىرىنشە، ونەركاسىپ پەن تاۋ-كەن وندىرىسىندە جاساندى ينتەللەكتىنى پايدالانۋ، جۇرگىزۋشىسىز كولىك، تسيفرلىق مەديتسينا، «اقىلدى قالالار»، سپۋتنيكتىك تەحنولوگيالار، ەلەكتروندى ساۋدا، دەرەكتەردى وڭدەۋ ورتالىقتارى جانە مەملەكەتتىك قىزمەتتەردى تسيفرلاندىرۋ باعىتتارىندا بىرلەسكەن جوبالاردى جۇزەگە اسىرۋعا مۇمكىندىك مول.
سونىمەن قاتار پرەزيدەنت جاساندى ينتەللەكتتىڭ ادامزات يگىلىگى ءۇشىن قىزمەت ەتۋى قاجەت ەكەنىن ەرەكشە اتاپ ءوتتى.
ء«بىزدىڭ پىكىرىمىزشە، جاساندى ينتەللەكت تەحنولوگيالىق تۇرعىدان دامىعان از عانا مەملەكەتتىڭ ارتىقشىلىعىنا اينالماۋى ءتيىس. سونداي-اق ول گەوساياسي تەكەتىرەس پەن قىسىم كورسەتۋدىڭ جاڭا قۇرالىنا اينالماۋى قاجەت. كەرىسىنشە، ادامزاتتىڭ ورتاق يگىلىگىنە قىزمەت ەتۋى كەرەك. بارلىق مەملەكەت زاماناۋي تەحنولوگيالارعا، بىلىمگە جانە ەسەپتەۋ رەسۋرستارىنا ءادىل قول جەتكىزۋ مۇمكىندىگىنە يە بولۋى قاجەت»، – دەدى قاسىم-جومارت توقاەۆ.
مەملەكەت باسشىسى بۇل ماسەلەدە قازاقستان مەن قىتايدىڭ ۇستانىمى ۇقساس ەكەنىن ايتتى. ول بيىل شىلدە ايىندا شانحايدا وتكەن جيىندا قازاقستاننىڭ جاساندى ينتەللەكت سالاسىنداعى ىنتىماقتاستىق جونىندەگى دۇنيەجۇزىلىك ۇيىمنىڭ (WAICO) نەگىزىن قالاۋشى 29 مەملەكەتتىڭ قاتارىنا ەنگەنىن ەسكە سالدى.
«بۇل – جاساندى ينتەللەكت سالاسىنداعى حالىقارالىق ىنتىماقتاستىقتى ۇيلەستىرۋدىڭ اشىق ءارى ءتيىمدى جۇيەسىن قالىپتاستىرۋ جولىنداعى ماڭىزدى قادام»، – دەدى ول.
ودان بولەك، قاسىم-جومارت توقاەۆ قازاقستاننىڭ ەۋرازياداعى تسيفرلىق حابقا اينالۋدى ماقسات ەتەتىنىن ايتىپ، ەكىباستۇز قالاسىندا جۇزەگە اسىرىلىپ جاتقان «دەرەكتەر ورتالىقتارى القابى» جوباسىنىڭ ستراتەگيالىق ماڭىزىنا توقتالدى.
بۇعان دەيىن قازاقستاندا قىتاي كاپيتالىمەن 9 مىڭنان استام كومپانيا جۇمىس ىستەيتىنىن جازعان ەدىك.
