قىتاي العاش رەت «چجۋتسيۋە-3» كوپ مارتە پايدالانىلاتىن زىمىران-تاسىعىشىنىڭ العاشقى ساتىسىن قۇرلىققا ءساتتى قوندىردى. ۇشىرۋ 19 تامىز كۇنى تاڭەرتەڭ ەلدىڭ سولتۇستىك-باتىسىنداعى دۋنفەن عارىش ايلاعىنان جۇزەگە اسىرىلدى، دەپ حابارلايدى «ادىرنا» ءتىلشىسى «سينحۋاعا» سىلتەمە جاساپ.
«چجۋتسيۋە-3-Y2» (Zhuque-3, ZQ-3) زىمىرانى بەيجىڭ ۋاقىتى بويىنشا ساعات 07:35-تە (استانا ۋاقىتىمەن 04:35 – رەد.) ۇشىرىلعان. ءبىرىنشى ساتى بولىنگەننەن كەيىن ارنايى تىرەكتەردىڭ كومەگىمەن باسقارىلاتىن قونۋ جاسالعان. ال ZQ-3 زىمىرانىنىڭ ەكىنشى ساتىسى ۇشۋىن جالعاستىرىپ، «حۋنحۋ-3» سپۋتنيگىن وربيتاعا شىعارعان.
زىمىراندى قىتايدىڭ كوممەرتسيالىق اەروعارىشتىق كومپانياسى LandSpace ازىرلەگەن. «چجۋتسيۋە-3» ەكى ساتىلى، ۇزىندىعى 66,1 مەتر، كورپۋسىنىڭ ديامەترى 4,5 مەتردى قۇرايدى. ونىڭ ءبىرىنشى ساتىسى تارتۋ كۇشىن رەتتەۋگە مۇمكىندىك بەرەتىن توعىز TQ-12A سۇيىق وتىندى قوزعالتقىشپەن جابدىقتالعان. زىمىران سۇيىق وتتەگى مەن مەتان وتىنىمەن جۇمىس ىستەيدى جانە جەردىڭ تومەنگى وربيتاسىنا جۇك شىعارۋعا ارنالعان.
ساراپشىلاردىڭ پىكىرىنشە، بۇل سىناقتىڭ ءساتتى ءوتۋى قىتايدىڭ تومەنگى وربيتاداعى سپۋتنيكتىك توپتاماسىن دامىتۋ قارقىنىن جەدەلدەتۋى مۇمكىن.
بۇعان دەيىن، 10 شىلدەدە قىتاي العاش رەت «چانچجەن-10B» (Long March 10B, CZ-10B) زىمىران-تاسىعىشىنىڭ العاشقى ساتىسىن تەڭىز پلاتفورماسىنا ءساتتى قايتارعان بولاتىن. سىناق ەلدىڭ وڭتۇستىگىندەگى حاينان ارالىندا وتكەن. زىمىران ۆەنچان عارىش ايلاعىنان ۇشىرىلىپ، ساتىلاردىڭ شتاتتىق بولىنۋىنەن كەيىن العاشقى ساتى باسقارىلاتىن تۇردە تومەن ءتۇسىپ، ارنايى تەڭىز پلاتفورماسىنداعى تورلى قونۋ جۇيەسىنىڭ كومەگىمەن ۇستالىپ قالعان.
سول كەزدە جەرگىلىكتى باق بۇل جەتىستىكتى قىتايدىڭ عارىش باعدارلاماسى ءۇشىن تاريحي كەزەڭ دەپ باعالاعان ەدى.
«قىتاي زىمىران-تاسىعىشتىڭ العاشقى ساتىسىن تىك باعىتتا قايتارۋ تەحنولوگياسىن مەڭگەرگەن الەمدەگى ەكىنشى ەلگە (اقش-تان كەيىن) اينالدى»، – دەپ جازدى قىتايلىق جۋرناليستەر.
