اقتوبەدەگى اسكەري بولىمدە سوققىعا جىعىلعان اقتاۋلىق ساربازدىڭ اناسى ۇلىنىڭ جاعدايى تۋرالى ايتتى، دەپ حابارلايدى «ادىرنا» ءتىلشىسى Lada.kz-كە سىلتەمە جاساپ.
گۇلدانا كەتىباەۆنىڭ سوزىنشە، ۇلى قاتتى ارىقتاپ كەتكەن.
«كوزى شۇڭىرەيىپ، ساقال-مۇرتى ءوسىپ كەتكەن، قاتتى جۇدەپتى. كيىمىن قوقىستان تاۋىپ العانداي، وتە لاس. اۋىستىراتىن كيىم دە اكەلمەگەن. فيزيكالىق تا، ەموتسيونالدىق تا جاعدايى وتە اۋىر. جالپى، قاراۋسىز قالعان ادام سياقتى كورىندى»،– دەدى ول.
ايتۋىنشا، كەزدەسۋدەن كەيىن اسكەري بولىمنەن ۇلىنا اۋىستىراتىن كيىم اكەلىنگەن. ايەل بالاسىنىڭ دەنساۋلىعىنا دا توقتالدى. قازىر وعان كاتەتەر قويىلعان، سەبەبى ول وزدىگىنەن ءزار شىعارا المايدى.
كەزدەسۋ كەزىندە سارباز اناسىنا شاپ تۇسىنا سوققى جاسالعانىن راستاعان. ايەلدىڭ سوزىنشە، سودان كەيىن ونىڭ جاعدايى ناشارلاپ، دارەتكە قالىپتى تۇردە بارا الماي قالعان.
اناسىنىڭ ايتۋىنشا، سوققىعا جىعىلعاننان كەيىن دە سەرجانتتار ۇلىنا اۋىرسىنۋىنا بايلانىستى فيزيكالىق تۇرعىدا ورىنداي المايتىن تاپسىرمالاردى بەرۋدى جالعاستىرعان. تاپسىرمالاردى ورىنداماعانى ءۇشىن ونى قايتادان ۇرعان.
«ەكى تاۋلىك بويى ول ءزار شىعارا الماعان. تەك سودان كەيىن ونى اقتوبە وبلىستىق اۋرۋحاناسىنا جەتكىزدى»، – دەدى ساربازدىڭ اناسى.
گۇلدانا كەتىباەۆانىڭ ايتۋىنشا، اسكەري پروكۋراتۋرا قر قىلمىستىق كودەكسىنىڭ 451-بابىنىڭ 1-بولىگى («بيلىكتى نەمەسە لاۋازىمدىق وكىلەتتىكتەردى اسىرا پايدالانۋ») بويىنشا قىلمىستىق ءىس قوزعاعان. بۇل باپ بويىنشا 5000 اەك-كە دەيىن (21 625 000 تەڭگە) ايىپپۇل سالۋ، سول مولشەردە تۇزەۋ جۇمىستارىنا تارتۋ، بەس جىلعا دەيىن باس بوستاندىعىن شەكتەۋ نەمەسە سول مەرزىمگە باس بوستاندىعىنان ايىرۋ جازاسى قاراستىرىلعان.
اسكەري قىزمەتكەر سوققىعا جىعۋعا قاتىسى بار دەپ اتاعان سەرجانتتاردىڭ اتى-ءجونىن ايەل ازىرگە جاريا ەتپەدى. سەبەبى قازىر ءىس تەرگەلىپ جاتىر.
قازىر اناسى ۇلىن باسقا اسكەري بولىمگە اۋىستىرۋدى تالاپ ەتىپ وتىرعان جوق. ول بالاسىنىڭ اسكەري قىزمەتتەن مەديتسينالىق سەبەپتەر بويىنشا بوساتىلعانىن قالايدى. قازىرگى ۋاقىتتا اتا-اناسى ۇلىمەن بىرگە اقتوبە وبلىستىق اۋرۋحاناسىندا جاتىر.
