اقتوبەدە ەر ادام ايەلىن ۇرىپ-سوقتى دەپ ايىپتالدى، دەپ حابارلايدى “ادىرنا” ۇلتتىق پورتالى.
سوت كۇدىكتىنى 8 جىلعا باس بوستاندىعىنان ايىردى.
جوعارى سوتتىڭ مالىمەتىنشە، ەر ادام ايەلىنە بىرنەشە رەت باسىنان سوققى جاساعان. وسىدان كەيىن جابىرلەنۋشىنىڭ جاعدايى كۇرت ناشارلاپ، ول توسەك تارتىپ جاتىپ قالعان.
العاشقى شاقىرتۋ كەزىندە جەدەل جاردەم دارىگەرلەرى اۋرۋحاناعا جاتقىزۋدى ۇسىنعانىمەن، ايەل ودان باس تارتقان. كەيىن ەكىنشى رەت جەتكىزىلگەنىمەن، ول جانساقتاۋ بولىمىندە كوز جۇمدى.
تەرگەۋ بارىسىندا ءبىر اي بۇرىن دا ەر ادامنىڭ ايەلىنە كۇش قولدانعانى انىقتالدى. ول بىرنەشە رەت جۇبايىنىڭ بەتىنە سوققى جاساعان. سوت-مەديتسينالىق ساراپتاماعا سايكەس، ايەلدىڭ ولىمىنە جابىق باس-مي جاراقاتى، قان قۇيىلۋ جانە مي ءىسىنۋى سەبەپ بولعان. ساراپشىلار جاراقات ءبىر كۇن بۇرىن سوققى سالدارىنان الىنعانىن، ول قۇلاۋ نەمەسە وزدىگىنەن تۋىنداۋى مۇمكىن ەمەستىگىن انىقتادى.
ايىپتالۋشى كىناسىن ءىشىنارا مويىندادى. پروكۋرور 10 جىلعا باس بوستاندىعىنان ايىرۋ جازاسىن سۇراعانىمەن، سوت ەر ادامدى 8 جىلعا سوتتادى. ۇكىم ءالى زاڭدى كۇشىنە ەنگەن جوق.
سونىمەن قاتار، سوت اقتوبە وبلىستىق دەنساۋلىق ساقتاۋ باسقارماسىنا جەكە قاۋلى جولداپ، جەدەل جاردەم قىزمەتىندەگى كەمشىلىكتەردى جويۋدى جانە مۇنداي جاعدايدىڭ قايتالانباۋىن قاداعالاۋدى تالاپ ەتتى.
