فوتو: امانجول ايتماعامبەتوۆ
اقتوبەدەگى نازارباەۆ زياتكەرلىك مەكتەبىنىڭ وقۋشىلارى «تۋعان ەلگە تاعزىم» اتتى زەرتتەۋ ەكسپەديتسياسى اياسىندا ەرەكشە جوبا دايىندادى. Oلار 4 مىڭ اسىقتان كيىز ءۇيدىڭ ماكەتىن جاساپ شىقتى.
جوباعا اقتوبەمەن قاتار استانا، وسكەمەن جانە تاراز قالالارىنداعى زياتكەرلىك مەكتەپتەردىڭ وقۋشىلارى قاتىستى. بيىلعى ەكسپەديتسيا ۇلى اقىن اباي قۇنانبايۇلىنىڭ 180 جىلدىعىنا ارنالدى.
مەكتەپ ديرەكتورى قايىربەك ءسابيتۇلىنىڭ ايتۋىنشا، جوباعا الدىن الا دايىندىق جۇرگىزىلگەن.
«وقۋشىلارعا اسىق جيناپ اكەلۋدى وتىندىك، سەبەبى 4 مىڭ اسىقتى تابۋ وڭاي ەمەس. اقتوبەلىك بالالار الدىن الا كارتوننان كيىز ءۇيدىڭ سۇلباسىن جاساپ قويدى، ال وزگە وڭىردەن كەلگەن وقۋشىلار اسىقتاردى جەلىممەن جابىستىردى. ماكەتتىڭ سالماعى – 15 كەلى، ديامەترى – 1 مەتر، بيىكتىگى – 80 سانتيمەتر. ەڭ باستىسى، جوبا ەكولوگيالىق تازا ماتەريالدارمەن جاسالدى. بۇل ارقىلى بالالارعا تابيعاتتى قورعاۋ مەن ۇلتتىق قۇندىلىقتاردى قۇرمەتتەۋدى ۇيرەتۋدى كوزدەدىك»، – دەدى ول.
ديرەكتوردىڭ ايتۋىنشا، وقۋشىلار بۇگىندە اسىق ويناۋعا دا ەرەكشە قىزىعۋشىلىق تانىتادى. ءۇزىلىس پەن بوس ۋاقىتتارىندا ولار ۇلتتىق ويىن تۇرلەرىمەن اينالىسىپ، ءداستۇردى جاڭعىرتۋعا اتسالىسىپ ءجۇر.
