پۋەرتو-ريكودان مايامي حالىقارالىق اۋەجايىنا باعىت العان Amazon Air اۋە كومپانياسىنىڭ جۇك ۇشاعى قونۋ كەزىندە ۇشۋ-قونۋ جولاعىنان شىعىپ كەتىپ، قورشاۋدى بۇزىپ وتكەن. بۇل تۋرالى BBC جازدى، دەپ حابارلايدى «ادىرنا» ءتىلشىسى.
ۇشاق بىرنەشە كولىكپەن سوقتىعىسىپ، ارتىنشا ورتەنگەن.
«كەمىندە بەس ادامنىڭ قازا بولعانىن راستاي الامىز»، — دەدى مايامي-دەيد وكرۋگىنىڭ مەرى دانيەللا لەۆين كاۆا ءباسپاسوز ءماسليحاتىندا. ونىڭ ايتۋىنشا، بىرنەشە ادام جاراقات الىپ، جەرگىلىكتى اۋرۋحانالارعا جەتكىزىلگەن.
كەيىنىرەك مايامي ءورت ءسوندىرۋ قىزمەتىنىڭ باسشىسى رايەد دجاداللاح بەس ادامنىڭ زارداپ شەككەنىن، ولاردىڭ ۇشەۋىنىڭ جاعدايى اۋىر ەكەنىن ناقتىلادى.
اپاتقا ۇشىراعان Boeing ۇشاعى Amazon كومپانياسى ءۇشىن جۇك تاسىمالىن جۇزەگە اسىراتىن 21 Air اۋە كومپانياسىنا تيەسىلى بولعان.
ەكى كومپانيا دا وقيعانى راستاپ، قازا تاپقانداردىڭ جاقىندارىنا كوڭىل ايتتى.
ء«بىز مارقۇمداردىڭ وتباسىلارىنا، تۋعان-تۋىستارىنا جانە وسى اۋىر قازاعا بايلانىستى زارداپ شەككەندەردىڭ بارلىعىنا شىنايى كوڭىل ايتامىز»، — دەلىنگەن Amazon كومپانياسىنىڭ وكىلى كەللي نانتەلدىڭ مالىمدەمەسىندە.
وقيعاعا بايلانىستى اۋەجاي جۇمىسى ۋاقىتشا شەكتەلگەن. بىرقاتار رەيس كەيىنگە شەگەرىلىپ، جولاۋشىلار باسقا باعىتتاردى ىزدەۋگە ءماجبۇر بولعان.
قازىرگى تاڭدا اپاتتى اقش-تىڭ كولىك قاۋىپسىزدىگى جونىندەگى ۇلتتىق كەڭەسى مەن فەدەرالدىق ازاماتتىق اۆياتسيا باسقارماسى تەرگەپ جاتىر.
