قازاقستاندا ازاماتتىق جانە ەكسپەريمەنتتىك اۆياتسياداعى اۋە وقيعالارىن تەرگەۋمەن اينالىساتىن ۋاكىلەتتى ورگان قۇرۋ جوسپارلانىپ وتىر، دەپ حابارلايدى "ادىرنا" ۇلتتىق پورتالى.
قۇجاتقا سايكەس، مەملەكەتتىك قاتىسۋى 100% بولاتىن اكتسيونەرلىك قوعام رەتىندە قۇرىلاتىن بۇل ورگان اۆياتسيالىق اپاتتار مەن وقىس وقيعالاردى تەرگەۋدى ۇيىمداستىرىپ، جۇرگىزۋگە جاۋاپتى بولادى.
جاڭا ورگانعا ازاماتتىق اۆياتسيا سالاسىنداعى ۋاكىلەتتى ورگانعا اۋە وقيعالارىن تەرگەۋگە قاتىستى نورماتيۆتىك-قۇقىقتىق اكتىلەر ازىرلەۋگە جاردەمدەسۋ، قازاقستان اۋماعىندا جانە شەتەلدە تىركەلگەن قازاقستاندىق ۇشاقتاردىڭ قاتىسۋىمەن بولعان اپاتتاردى تەرگەۋگە قاتىسۋ جانە اۆياتسيالىق وقيعالاردىڭ الدىن الۋ جانە ولاردىڭ سالدارىن ازايتۋ بويىنشا ۇسىنىستار ازىرلەۋ مىندەتتەلەدى.
سونىمەن قاتار، اۋە وقيعالارىنىڭ ستاتيستيكاسىن جۇرگىزۋ جانە حالىقارالىق ۇيىمدارمەن دەرەكتەر الماسۋ، تەرگەۋ بارىسىندا دالەلدەردى ساقتاۋ جانە قۇپيا اقپاراتتىڭ قورعالۋىن قامتاماسىز ەتۋ، حالىقارالىق ازاماتتىق اۆياتسيا ۇيىمىنىڭ (ICAO) ستاندارتتارى مەن ۇسىنىستارىن ساقتاۋ مونيتورينگىن جۇرگىزۋ جانە ICAO-عا قازاقستاندىق زاڭنامانىڭ حالىقارالىق تالاپتاردان ايىرماشىلىعى تۋرالى ۋاقتىلى حابارلاۋ مىندەتى جۇكتەلەدى.
جاڭا ورگان 2025 جىلدىڭ سوڭىنا دەيىن قۇرىلماق. بۇل باستاما قازاقستانداعى اۆياتسيالىق قاۋىپسىزدىك دەڭگەيىن ارتتىرۋ جانە حالىقارالىق تالاپتارعا سايكەستىكتى قامتاماسىز ەتۋ ماقساتىندا قولعا الىنىپ وتىر.
