ماڭعىستاۋ وبلىسىنداعى قورقىنىشتى جول اپاتىنان قازا تاپقانداردىڭ تۋىستارىن ۇلتتىق ۇلاننىڭ ارنايى ۇشاعى اپات بولعان ايماققا قاراي الىپ ۇشتى، دەپ حابارلايدى “ادىرنا”.
ىشكى ىستەر مينيسترلىگى سول ارقىلى مارقۇمداردىڭ ارتىندا قالعان جاقىندارىنا قولداۋ كورسەتىپ، دەمەۋ بولماق.
«ىشكى ىستەر مينيسترلىگىنە قاراستى ۇلتتىق ۇلاننىڭ ارنايى بورتى جول اپاتىنان قازا تاپقان ازاماتتاردىڭ تۋىستارىن ماڭعىستاۋ وبلىسىنا الىپ ۇشتى. مارقۇمداردىڭ جاقىندارى مايىتتەردى تانىپ، قاجەتتى قۇجاتتاردى راسىمدەيدى. وسى ۇشاق قازا تاپقانداردىڭ دەنەلەرىن ءوز ايماقتارىنا جەتكىزىپ بەرەدى»، - دەپ حابارلادى ءىىم رەسمي وكىلى - دەپارتامەنت باستىعى شىڭعىس الەكەشەۆ.
اقپاراتقا سايكەس، قازا تاپقانداردىڭ ىشىندە — بەس ايەل قاراعاندى وبلىسىنان، بىرەۋى استانا قالاسىنان بارعان ايەل.
«وسىلايشا، ىشكى ىستەر مينيسترلىگى قازا تاپقانداردىڭ وتباسىلارىنا جەدەل كومەك كورسەتىپ، مايىتتەردى تاسىمالداۋ جانە جەرلەۋ راسىمىنە شۇعىل كومەك بەرەدى»، - دەپ حابارلايدى دەرەككوز.
ەستەرىڭىزگە سالا كەتەيىك، كەشە، 11 قىركۇيەك كۇنى ماڭعىستاۋ وبلىسىنداعى جانتۇرشىگەرلىك جول اپاتىنان 10 ادام كوز جۇمدى. تراگەديا 11 قىركۇيەك كۇنى قاراقيا اۋدانى سەنەك ەلدى مەكەنىنەن 90 شاقىرىم قاشىقتىقتا بولعان.
