ورمۇز بۇعازى كەمە قاتىناسى ءۇشىن تولىعىمەن جابىلىپ، يران قارۋلى كۇشتەرىنىڭ باقىلاۋىنا ءوتتى. بۇل تۋرالى يراننىڭ جوعارى ۇلتتىق قاۋىپسىزدىك كەڭەسىنىڭ حاتشىسى موحسەن رەزاي مالىمدەدى، دەپ حابارلايدى «ادىرنا» ءتىلشىسى Press TV-گە سىلتەمە جاساپ.
ول اقش پرەزيدەنتى دونالد ترامپتىڭ ستراتەگيالىق ماڭىزى زور بۇعاز اشىق دەگەن ءسوزىن «ۇلكەن وتىرىككە» بالادى.
رەزايدىڭ ايتۋىنشا، الداعى كۇندەرى يسلام رەسپۋبليكاسى ورمۇز بۇعازىنىڭ سىرتىندا كىرۋگە شەكتەۋ قويىلعان ايماق قۇرىلاتىنىن جاريالايدى. سونداي-اق ول تەگەرانمەن الدىن الا كەلىسىمسىز بۇل ايماققا كىرگەن كەز كەلگەن كەمە يراننىڭ سانكتسيالىق تىزىمىنە ەنگىزىلەتىنىن ءتۇسىندىردى.
ودان بولەك، رەزاي بۇعاز ارقىلى وتۋگە تىرىسقان امەريكالىق كەمەلەرگە يران اسكەرى وق جاۋدىراتىنىن، الايدا قورشاعان ورتاعا زيان كەلتىرمەۋ ءۇشىن ولاردى سۋعا باتىرمايتىنىن ايتتى.
«يران مۇناي تاسىمالدايتىن كونتراباندالىق امەريكالىق كەمەلەردى سۋعا باتىرماۋ تۋرالى شەشىم قابىلدادى، ويتكەنى بۇل ايماقتاعى قورشاعان ورتاعا زيان كەلتىرۋى مۇمكىن»، – دەدى ول.
بۇعان دەيىن پەنتاگوننىڭ ورتالىق قولباسشىلىعى (CENTCOM) اقش كۇشتەرى حارك ارالى ماڭىندا، جاسك اۋدانىندا جانە ومان شىعاناعىندا يراننىڭ ءۇش مۇناي تانكەرىنە شابۋىل جاساعانىن حابارلاعان. بۇعان جاۋاپ رەتىندە يران كۇشتەرى ورمۋز بۇعازىندا اقش-پەن بايلانىسى بار ءۇش مۇناي تانكەرىنە سوققى جاساعان.
