يرانداعى سوڭعى نارازىلىق اكتسيالارىنا بايلانىستى بۇۇ قاۋىپسىزدىك كەڭەسى شۇعىل وتىرىس وتكىزدى. بۇل جيىن اقش باستاماسىمەن شاقىرىلىپ، يرانداعى جاعداي حالىقارالىق قاۋىپسىزدىك تۇرعىسىنان تالقىلاندى.
بۇۇ جانىنداعى اقش-تىڭ تۇراقتى وكىلى مايك ۋولتتس ءوز سوزىندە يران بيلىگىن ازاماتتارعا قارسى زورلىق-زومبىلىق كورسەتىپ، جاپپاي قۋعىن-سۇرگىن جۇرگىزىپ وتىر دەپ ايىپتادى. ونىڭ ايتۋىنشا، رەجيمنىڭ ءوز حالقىنا قارسى قولدانعان كۇش دەڭگەيى ىشكى ماسەلە شەڭبەرىنەن اسىپ، حالىقارالىق بەيبىتشىلىك پەن قاۋىپسىزدىككە تىكەلەي اسەر ەتە باستاعان.
ۋولتتس تەگەران بيلىگى بۇل جاعدايدى ء«وزىمىزدىڭ ىشكى ءىسىمىز» رەتىندە كورسەتۋگە تىرىساتىنىن ايتتى. الايدا ول مۇنداي ۇستانىمدى «مۇلدە جالعان ءارى اداستىراتىن پىكىر» دەپ باعالادى. سونداي-اق قازىرگى جاعداي بۇۇ قاۋىپسىزدىك كەڭەسىنىڭ تىكەلەي نازارىن جانە ارالاسۋىن تالاپ ەتەتىنىن جەتكىزدى.
«يران حالقى يسلام رەسپۋبليكاسىنىڭ بۇكىل تاريحىندا بۇرىن-سوڭدى بولماعان دەڭگەيدە ەركىندىك تالاپ ەتىپ وتىر»، – دەدى ديپلومات.
بۇۇ-دا يرانداعى احۋالعا قاتىستى وتكەن وتىرىستا اقش-تىڭ بۇۇ جانىنداعى تۇراقتى وكىلى مايك ۋولتتس ەلدە جالعاسىپ جاتقان جاپپاي نارازىلىقتارعا بايلانىستى مالىمدەمە جاساپ، ۆاشينگتوننىڭ ۇستانىمىن جاريا ەتتى. ول كوشەگە شىعىپ جاتقان ازاماتتاردىڭ قارۋسىز ءارى بەيبىت ەكەنىن اتاپ ءوتىپ، اقش يران حالقىن قولدايتىنىن جەتكىزدى.
ۋولتتستىڭ ايتۋىنشا، نارازىلىققا شىققان ادامدار – ءوز ەلىن سۇيەتىن پاتريوتتار جانە جاقسى بولاشاق ءۇشىن زاڭدى تالاپتار قويىپ وتىرعان ازاماتتار.
«كوشەگە شىققان ادامدار – قارۋسىز ءارى بەيبىت تۇرعىندار. ولار ءوز ەلىن سۇيەتىن جانە جاقسى بولاشاق ءۇشىن زاڭدى تالاپتار قويىپ وتىرعان پاتريوتتار»، – دەدى اقش وكىلى.
ول سونداي-اق اقش پرەزيدەنتى دونالد ترامپ پەن امەريكا قۇراما شتاتتارى يراننىڭ باتىل حالقىنا قولداۋ بىلدىرەتىنىن مالىمدەدى.
