فوتو: 24.kg
VI دۇنيەجۇزىلىك كوشپەندىلەر ويىندارىنىڭ التىنشى جارىس كۇنىندە قازاقستان قۇراماسى قورجىنىنا بىرقاتار جۇلدە قوستى. ناتيجەسىندە ۇلتتىق قۇرامانىڭ التىن مەدال سانى 32-گە جەتتى.
بۇگىن سپورتشىلار كوكپار، كوكبورى، توعىزقۇمالاق، مانگالا جانە وۆاري بويىنشا باق سىنادى.
زياتكەرلىك سپورت تۇرلەرىندەگى شەشۋشى باسەكەلەردە قازاقستاندىقتار جوعارى ناتيجە كورسەتتى. توعىزقۇمالاقتان ەل سپورتشىلارى 4 التىن جانە 2 كۇمىس مەدال جەڭىپ الدى. ال مانگالا جارىسىندا قازاقستان قۇراماسىنىڭ وكىلدەرى 2 التىن، 2 كۇمىس جانە 1 قولا جۇلدەگە قول جەتكىزدى.
افريكا حالىقتارىنىڭ ءداستۇرلى زياتكەرلىك ويىنى سانالاتىن وۆاري سايىسىندا دا قازاقستاندىق سپورتشىلار جۇلدە يەلەندى.
ال كوكبورىدەن فينالدىق كەزەڭدە قازاقستان مەن قىرعىزستان قۇرامالارى كەزدەستى. تارتىستى وتكەن شەشۋشى ويىندا قىرعىز سپورتشىلارى باسىم ءتۇسىپ، التىن مەدالدى جەڭىپ العان بولاتىن. قازاقستان قۇراماسى جارىستى كۇمىس جۇلدەمەن اياقتادى.
وسىلايشا، VI دۇنيەجۇزىلىك كوشپەندىلەر ويىندارىندا قازاقستان قۇراماسىنىڭ قورجىنىنداعى التىن مەدال سانى 32-گە جەتتى.
