الماتى وبلىسى ەلىمىزدەگى ينۆەستيتسيالىق تارتىمدى وڭىرلەردىڭ بىرىنە اينالىپ كەلەدى. جاقىن ۋاقىتتا مۇندا PepsiCo, Lays, Mars, Marriott جانە Hilton سياقتى الەمدىك جەتەكشى كومپانيالاردىڭ بىرقاتار ءىرى جوباسى ىسكە قوسىلادى. بۇل تۋرالى وبلىس اكىمى مارات سۇلتانعازيەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا مالىمدەدى.
اكىمنىڭ ايتۋىنشا، PepsiCo كومپانياسى Lays چيپستەرىن شىعارۋ ءۇشىن نارىنقولدا وسىرىلگەن كارتوپتى پايدالاناتىن بولادى، ال Mars وڭىردە جاڭا وندىرىستىك جەلى اشۋ مۇمكىندىگىن قاراستىرۋدا. سونىمەن قاتار حالىقارالىق قوناقۇي يندۋسترياسىنىڭ الىپتارى – Marriott جانە Hilton برەندتەرى قوناەۆ پەن الاتاۋ قالالارىندا جاڭا قوناقۇيلەر سالۋدى جوسپارلاپ وتىر. بۇل قادام ءوڭىردىڭ تۋريزم جانە بيزنەس-تۋريزم نارىعىنا ايتارلىقتاي سەرپىن بەرمەك.
الماتى وبلىسى تۋريزم مەن ينفراقۇرىلىمدى دامىتۋ باعىتىندا دا قارقىندى جۇمىس جۇرگىزۋدە. ASP-Arena سپورت-تۋريزم كەشەنى، «Oi-Qaragai» كۋرورتىنىڭ كەڭەيۋى، جاعاجايلار مەن دەمالىس ايماقتارىن اباتتاندىرۋ — وسىنىڭ ايقىن دالەلى.
وڭىردە قازىردىڭ وزىندە بىرنەشە ءىرى ينۆەستيتسيالىق جوبالار جۇزەگە اسىرىلىپ جاتىر. ولاردىڭ قاتارىندا: قۇنى 70 ملرد تەڭگە بولاتىن Focus Logistics لوگيستيكالىق پاركى، بەتون ونىمدەرىن شىعاراتىن «التىن تاعا» زاۋىتى، زاماناۋي LC Waikiki كوتەرمە-تاراتۋ ورتالىعى، ەكسپورتقا باعىتتالعان Shin-Line فابريكاسى، استىق پەن مايلى داقىلداردى تەرەڭ وڭدەيتىن «قاپشاعاي بيداي ونىمدەرى» اگروكومپلەكسى، كەگەن اۋدانىنداعى «كەگەنمياسپروم» ەت كومبيناتى بار.
جىل سوڭىنا دەيىن تاعى بىرنەشە ا-ساناتىنداعى وبەكتىلەر ىسكە قوسىلادى. ولار – MP Solution, Kusto Logistics, ەۋرازيالىق لوگيستيكالىق پارك، Imagine Apple Logistics ورتالىقتارى. بۇل جوبالار جاڭا جۇمىس ورىندارىن اشىپ، ءوڭىردىڭ يندۋستريالدىق جانە لوگيستيكالىق حاب رەتىندەگى الەۋەتىن نىعايتادى. سونىمەن بىرگە، الماتى وبلىسىندا شاعىن جانە ورتا بيزنەس تە قارقىندى دامۋدا: جۇمىس ىستەيتىن سۋبەكتىلەر سانى 156 مىڭنان استى، ال ولاردىڭ ەكونوميكالىق ۇلەسى 46%-عا جەتتى.
