اۋعانستاننىڭ مازاري-شاريف قالاسىندا 3 قىركۇيەك كۇنۋ ەلدەگى ەتنيكالىق قازاقتاردىڭ باسىن قوسقان تۇڭعىش «اۋعانستان قازاقتارىنىڭ قۇرىلتايى» ءوتتى. ءىس-شارا تۋرالى قانداستار ماسەلەسىن زەرتتەپ جۇرگەن مامان قىدىرالى ورازۇلى الەۋمەتتىك جەلىدەگى پاراقشاسىندا جازدى, دەپ حابارلايدى “ادىرنا”.
قۇرىلتايدى «اۋعانستان-قازاق مادەني ورتالىعىنىڭ» باسشىسى اسادۋللا ويماۋىت ۇيىمداستىرعان.
«قۇرىلتايعا اۋعانستاننىڭ ءار ايماعىندا تۇراتىن قانداستارىمىز جينالىپ، ءوزارا تانىسىپ، ۇمىتىلىپ بارا جاتقان قازاقتىڭ سالت-ءداستۇرى مەن مادەنيەتىن تاماشالادى. قۋانىشتان كوزدەرىنە جاس العاندار دا بولدى»، – دەپ جازدى قىدىرالى ورازۇلى.
اشىق دەرەككوزدەردە تاراعان مالىمەتكە قاراعاندا، شاراعا كابۋلدان اۋعانستان مادەنيەت ءمينيسترىنىڭ ورىنباسارى ارنايى قاتىسىپ، ءسوز سويلەگەن. ونىڭ ايتۋىنشا، ۆيتسە-مينيستر قازاق دياسپوراسى ازىرلەگەن قولونەر بۇيىمدارى مەن مادەني باعدارلامالارعا جوعارى باعا بەرگەن.
سونىمەن قاتار مازاري-شاريف قالاسى اكىمىنىڭ ورىنباسارى دا قۇرىلتايعا قاتىسىپ، اۋعانستانداعى قازاق قاۋىمداستىعىنا قولداۋ بىلدىرگەن.
الايدا جيىنعا قازاقستاننىڭ اۋعانستانداعى ەلشىسى عازيز اقباسوۆ پەن باس كونسۋل احان ەسەنباەۆ قاتىسپاعان. قىدىرالى ورازۇلىنىڭ مالىمەتىنشە، ديپلوماتيالىق وكىلدەر قۇرىلتايعا كەلەتىنىن الدىن الا حابارلاعانىمەن، ءىس-شاراعا ءبىر كۇن قالعاندا قاتىسا المايتىنىن مالىمدەگەن.
ۇيىمداستىرۋشىلاردىڭ ايتۋىنشا، ەلشىگە شارادان شامامەن 10 كۇن بۇرىن ۇيىم مەن قالا اكىمدىگىنىڭ ءمورى قويىلعان رەسمي شاقىرۋ تابىستالعان. ەلشى قۇرىلتايعا قاتىساتىنىن راستاعان. الايدا جيىن قارساڭىندا ۇيىمداستىرۋشىلارعا ءوزىنىڭ كەلە المايتىنىن حابارلاعان.
اشىق دەرەككوزدەردە كەلتىرىلگەن مالىمەتتەر بويىنشا، بۇگىندە اۋعانستاندا شامامەن 3,3 مىڭ ەتنيكالىق قازاق تۇرادى. ال بەيرەسمي اقپاراتتاردا قازاق وتباسىلارىنىڭ سانى 3 مىڭعا دەيىن جەتۋى مۇمكىن ەكەنى ايتىلادى.
بۇل رەتتە قازاقستاننىڭ سىرتقى ىستەر مينيسترلىگى ۇسىنعان رەسمي دەرەكتە اۋعانستاندا 15 قازاق وتباسى نەمەسە شامامەن 200 ەتنيكالىق قازاق تىركەلگەنى كورسەتىلگەن.
اۋعانستانداعى قازاقتاردىڭ باسىم بولىگى مازاري-شاريف، قۇندىز، كابۋل جانە باعلان قالالارى مەن ايماقتارىندا تۇرادى.
