23 تامىزدا قازاقستاندا ءبىر پالاتالى پارلامەنت – قۇرىلتاي دەپۋتاتتارىنىڭ سايلاۋى وتەدى، دەپ حابارلايدى "ادىرنا" ءتىلشىسى.
بۇل – جاڭا كونستيتۋتسيا قابىلدانعاننان كەيىنگى العاشقى پارلامەنتتىك سايلاۋ.
22 تامىز – تىنىشتىق كۇنى. بۇل كۇنى ۇگىت-ناسيحات جۇرگىزۋگە، كانديداتتار مەن پارتيالاردى قولداۋعا شاقىراتىن ماتەريالدار جاريالاۋعا جانە الەۋمەتتىك جەلىدە مۇنداي جازبالاردى رەپوست جاساۋعا بولمايدى. بۇعان دەيىن جاريالانعان جازبالاردى ءوشىرۋ مىندەتتى ەمەس.
سايلاۋ ۋچاسكەلەرى 23 تامىزدا ساعات 07:00-دەن 20:00-گە دەيىن جۇمىس ىستەيدى. كەيبىر اسكەري بولىمدەردەگى 107 ۋچاسكە ساعات 06:00-دە اشىلادى.
ءوز سايلاۋ ۋچاسكەڭىزدى gov.kz, sailau.gov.kz, sailau2026.gov.kz سايتتارىنان نەمەسە eGov Mobile قوسىمشاسىنان تەكسەرۋگە بولادى.
داۋىس بەرۋ بيۋللەتەنىندە 7 ساياسي پارتيا جانە «بارلىعىنا قارسىمىن» دەگەن نۇسقا بولادى. تاڭداعان نۇسقاڭىزدىڭ جانىنا ءبىر بەلگى قويۋ قاجەت.
تولتىرىلعان بيۋللەتەندى سۋرەتكە نەمەسە ۆيدەوعا ءتۇسىرىپ، جاريالاۋعا بولمايدى. بۇل داۋىس بەرۋ قۇپياسىن بۇزۋ جانە ۇگىت-ناسيحات رەتىندە باعالانۋى مۇمكىن.
سايلاۋعا 18 جاسقا تولعان قازاقستان ازاماتتارى قاتىسا الادى. دەنساۋلىعىنا بايلانىستى ۋچاسكەگە بارا المايتىن ازاماتتار ۇيدە داۋىس بەرۋ مۇمكىندىگىن پايدالانا الادى. ال شەتەلدەگى قازاقستاندىقتار ەلشىلىكتەر مەن كونسۋلدىقتار جانىنداعى سايلاۋ ۋچاسكەلەرىندە داۋىس بەرە الادى.
ۇگىت جۇرگىزۋگە تىيىم سالىنعان كەزەڭدەگى زاڭ بۇزۋشىلىق ءۇشىن 15-تەن 35 اەك-كە دەيىن ايىپپۇل قاراستىرىلعان.
