Auǧanstannyŋ Mazari-Şarif qalasynda 3 qyrküiek künu eldegı etnikalyq qazaqtardyŋ basyn qosqan tūŋǧyş «Auǧanstan qazaqtarynyŋ qūryltaiy» öttı. Is-şara turaly qandastar mäselesın zerttep jürgen maman Qydyrälı Orazūly äleumettık jelıdegı paraqşasynda jazdy, dep habarlaidy “Adyrna”.
Qūryltaidy «Auǧanstan-Qazaq mädeni ortalyǧynyŋ» basşysy Asadulla Oimauyt ūiymdastyrǧan.
«Qūryltaiǧa Auǧanstannyŋ är aimaǧynda tūratyn qandastarymyz jinalyp, özara tanysyp, ūmytylyp bara jatqan qazaqtyŋ salt-dästürı men mädenietın tamaşalady. Quanyştan közderıne jas alǧandar da boldy», – dep jazdy Qydyrälı Orazūly.
Aşyq derekközderde taraǧan mälımetke qaraǧanda, şaraǧa Kabuldan Auǧanstan Mädeniet ministrınıŋ orynbasary arnaiy qatysyp, söz söilegen. Onyŋ aituynşa, vise-ministr qazaq diasporasy äzırlegen qolöner būiymdary men mädeni baǧdarlamalarǧa joǧary baǧa bergen.
Sonymen qatar Mazari-Şarif qalasy äkımınıŋ orynbasary da qūryltaiǧa qatysyp, Auǧanstandaǧy qazaq qauymdastyǧyna qoldau bıldırgen.
Alaida jiynǧa Qazaqstannyŋ Auǧanstandaǧy elşısı Ǧaziz Aqbasov pen bas konsul Ahan Esenbaev qatyspaǧan. Qydyrälı Orazūlynyŋ mälımetınşe, diplomatiialyq ökılder qūryltaiǧa keletının aldyn ala habarlaǧanymen, ıs-şaraǧa bır kün qalǧanda qatysa almaitynyn mälımdegen.
Ūiymdastyruşylardyŋ aituynşa, elşıge şaradan şamamen 10 kün būryn ūiym men qala äkımdıgınıŋ mörı qoiylǧan resmi şaqyru tabystalǧan. Elşı qūryltaiǧa qatysatynyn rastaǧan. Alaida jiyn qarsaŋynda ūiymdastyruşylarǧa özınıŋ kele almaitynyn habarlaǧan.
Aşyq derekközderde keltırılgen mälımetter boiynşa, bügınde Auǧanstanda şamamen 3,3 myŋ etnikalyq qazaq tūrady. Al beiresmi aqparattarda qazaq otbasylarynyŋ sany 3 myŋǧa deiın jetuı mümkın ekenı aitylady.
Būl rette Qazaqstannyŋ Syrtqy ıster ministrlıgı ūsynǧan resmi derekte Auǧanstanda 15 qazaq otbasy nemese şamamen 200 etnikalyq qazaq tırkelgenı körsetılgen.
Auǧanstandaǧy qazaqtardyŋ basym bölıgı Mazari-Şarif, Qūndyz, Kabul jäne Baǧlan qalalary men aimaqtarynda tūrady.
