قازاقستان پرەزيدەنتى قاسىم-جومارت توقاەۆ ءوزىنىڭ الداعى پرەزيدەنت سايلاۋىنا قاتىسۋى تۋرالى قازىردەن پىكىر ايتۋعا ءالى ەرتە ەكەنىن مالىمدەدى.
بۇل تۋرالى قازاقستان پرەزيدەنتىنىڭ ءباسپاسوز قىزمەتى حابارلادى، دەپ جازدى "ادىرنا".
«كونستيتۋتسيالىق سوت وسىنداي شەشىم قابىلدادى. بۇل شەشىم زاڭدى، تيىسىنشە مەنىڭ قايتا سايلانۋعا زاڭدى قۇقىعىم بار. بىراق الداعى سايلاۋ، ءسىز ايتقانداي، سايلاۋعا بارامىن با، بارمايمىن با، قاي جىلى دەگەن ماسەلەگە قاتىستى قازىر پىكىر ايتۋعا ءالى ەرتە. سەبەبى ەلىمىزدىڭ الدىندا تۇرعان كوپتەگەن مىندەتتى ورىنداۋىمىز كەرەك. ەڭ الدىمەن، بۇكىل قازاقستاندى، اسىرەسە ازاماتتارعا قاجەتتى الەۋمەتتىك نىساندار بويىنشا، ۇلكەن قۇرىلىس الاڭىنا اينالدىرۋىمىز قاجەت»، – دەدى توقاەۆ.
پرەزيدەنت 2027 جىلى ءوزىنىڭ پرەزيدەنت سايلاۋىنا قاتىسۋ-قاتىسپاۋىنا قاتىستى ناقتىراق جاۋاپ بەرە الاتىنىن ايتتى.
«سوندىقتان تاعى ءبىر كەزدەسىپ، سويلەسەيىك. مۇمكىن، كەلەسى جىلى بۇل سۇراققا ناقتىراق جاۋاپ بەرەرمىن»، – دەدى مەملەكەت باسشىسى.
قازاقستان كونستيتۋتسياسىنا سايكەس، پرەزيدەنت جەتى جىلدىق ءبىر مەرزىمگە سايلانادى. بيىل جاڭا كونستيتۋتسيا قابىلدانعاننان كەيىن قازاقستاننىڭ كونستيتۋتسيالىق سوتى قايتا سايلانۋ قازىرگى پرەزيدەنت ءۇشىن العاشقى پرەزيدەنتتىك مەرزىم بولىپ ەسەپتەلەتىنىن مالىمدەگەن. وسىعان بايلانىستى قاسىم-جومارت توقاەۆتىڭ كەلەسى پرەزيدەنت سايلاۋىنا قاتىسۋىنا زاڭدى مۇمكىندىك بار.
قازىرگى پرەزيدەنتتىڭ وكىلەتتىك مەرزىمى 2029 جىلى اياقتالادى.
