تۇركىستان قالاسىنداعى ق.ا.ياساۋي اتىنداعى حقتۋ-دا مەملەكەت باسشىسى قاسىم-جومارت توقاەۆتىڭ «ادىلەتتى قوعامعا – شىنشىل ءسوز» اتتى كىتابىن تانىستىرۋعا ارنالعان دوڭگەلەك ۇستەل ءوتتى.
جيىننىڭ ماقساتى – مەملەكەت باسشىسىنىڭ قوعامدىق-ساياسي كوزقاراستارى مەن ەل دامۋىنىڭ وزەكتى باعىتتارىن قامتيتىن ەڭبەكتىڭ مازمۇنىن تالقىلاۋ، كىتاپتا كوتەرىلگەن ماسەلەلەردىڭ قازىرگى قوعام ءۇشىن ماڭىزىن سارالاۋ. باسقوسۋعا ارداگەرلەر مەن مەملەكەتتىك باسقارۋ، ءبىلىم، عىلىم، مادەنيەت، قۇقىق، جاستار ساياساتى جانە قوعامدىق سالانىڭ وكىلدەرى، زيالى قاۋىم، اقىن-جازۋشىلار، وقىتۋشىلار مەن جاس عالىمدار قاتىستى.
ايتا كەتەيىك، «ادىلەتتى قوعامعا – شىنشىل ءسوز» – پرەزيدەنتتىڭ مەملەكەت، قوعام جانە ازامات تۋرالى ويلارىنىڭ ساباقتاستىعىن كورسەتەتىن جيناق. بۇل كىتاپتا مەملەكەت باسشىسىنىڭ 30 جىلدان استام ۋاقىت ىشىندە قالىپتاسقان ساياسي جانە ازاماتتىق ۇستانىمدارى، مەملەكەت باسقارۋ تاجىريبەسى، ۇلتتىق قۇندىلىقتار مەن قوعام دامۋىنا قاتىستى پايىمدارى جيناقتالعان.
جيىن مودەراتورى، ۋنيۆەرسيتەت رەكتور جانار تەمىربەكوۆا ءوز سوزىندە: «بۇگىنگى باسقوسۋ – كىتاپتى كوپشىلىككە تانىستىرۋمەن عانا شەكتەلەتىن شارا ەمەس. بۇل – ەلىمىزدىڭ بۇگىنى مەن بولاشاعىنا قاتىستى مەملەكەتتىك ۇستانىمداردى، قوعامدىق قۇندىلىقتاردى جانە ءار ازاماتتىڭ جاۋاپكەرشىلىگىن تەرەڭىرەك زەردەلەۋگە مۇمكىندىك بەرەتىن ماڭىزدى پىكىر الاڭى. الدارىڭىزداعى كىتاپتا مەملەكەت باسشىسىنىڭ تاۋەلسىزدىكتىڭ العاشقى جىلدارىنان بەرى وتاندىق جانە حالىقارالىق جيىنداردا، قوعامدىق كەزدەسۋلەردە ايتقان تاڭدامالى سوزدەرى، ماقالالارى مەن سۇحباتتارىندا، سونداي-اق ەڭبەكتەرىندە كورىنىس تاپقان وي-تۇجىرىمدارى جيناقتالعان. وتىز بەس جىلعا جۋىق كەزەڭدى قامتيتىن بۇل ماتەريالدار پرەزيدەنتتىڭ مەملەكەتشىلدىك ۇستانىمىن، ساياسي تاجىريبەسىن جانە ەل دامۋىنا قاتىستى كوزقاراسىنىڭ قالىپتاسۋ جولىن تانىتادى»، - دەدى.
تۇركىستان وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ: «كەيبىر كىتاپ ادامعا اقپارات بەرسە، كەيبىرى ءبىلىم بەرەدى. ەندى ءبىرى ادامنىڭ ويلاۋ باعىتىن ايقىنداپ، قوعامنىڭ قايدا بەت الۋى كەرەك ەكەنى جونىندە باعدار بەرەدى. پرەزيدەنتىمىز «ادىلەتتى قوعامعا – شىنشىل ءسوز» كىتابىندا جوعارىدا ايتىپ وتكەن ءۇش باعىتتى دا بەرىپ وتىر. كىتاپتا ءبىرتۇتاس مەملەكەتشىلدىك پەن دۇنيەتانىم جاتىر. كىتاپتىڭ ءوزى 21 تاقىرىپقا بولىنگەن. ءار بولىمدە ادىلەتتى، قۋاتتى، جاۋاپكەرشىلىگى جوعارى قازاقستاندى قالىپتاستىرۋ يدەياسى جان-جاقتى قاراستىرىلعان»،-دەدى.
دوڭگەلەك ۇستەلدە فيلولوگيا عىلىمدارىنىڭ كانديداتى، پروفەسسور، بەكجىگىت سەردالى «ۇلت ساپاسى، مەملەكەتتىك باسقارۋ، عىلىم مەن ءبىلىم، مادەنيەت جانە رۋحانيات تۋرالى پايىمدار» تاقىرىبىندا، ال وبلىستىق جاستار رەسۋرستىق ورتالىعىنىڭ ءبولىم باسشىسى ناريمان مارحاباەۆ «جاستارعا ارنالعان ويلار: ءبىلىم، ەڭبەك، جاۋاپكەرشىلىك جانە بولاشاق» جونىندە بايانداما وقىدى. «ادىلەت» پارتياسى جانىنداعى جاستار قاناتى تۇركىستان وبلىستىق فيليالىنىڭ توراعاسى ەركەبۇلان ماديارۇلى دا ءوزىنىڭ وتكىر ويىن ورتاعا سالدى. جيىن سوڭىندا قاتىسۋشىلار كىتاپتا قامتىلعان وي-تۇجىرىمداردىڭ بۇگىنگى قوعام ءۇشىن وزەكتى ەكەنىن اتاپ ءوتتى.
