تۇركىستان وبلىسىنىڭ شاردارا اۋدانىنداعى 5 جىل بۇرىن سالىنعان مەكتەپ قاۋىپتى جاعدايدا تۇر. ونداي جەردە وقۋ قاۋىپتى بولعاندىقتان بىرنەشە سىنىپ جابىلدى. ويتكەنى، قابىرعالارى قۇلاپ كەتۋى مۇمكىن، دەپ حابارلايدى “ادىرنا” ۇلتتىق پورتالى.
وtyrar.kz سايتىنىڭ حابارلاۋىنشا، مەردىگەر كومپانيا كەپىلدىك مەرزىمىنىڭ اياقتالۋىن سىلتاۋراتىپ، كەمشىلىكتەردى جويۋدان باس تارتىپ وتىر.
250 ورىندىق مەكتەپ شاردارا قالاسىنىڭ ىرگەسىندەگى وتەعۇلۇلى اۋىلىندا ورنالاسقان. ول 5 جىل بۇرىن عانا سالىنىپ، پايدالانۋعا بەرىلگەن، بىراق قازىر مۇندا وقۋ كۇن سايىن قاۋىپتى بولىپ بارادى. مەكتەپ اسحاناسىنىڭ قابىرعالارى قيسايىپ، قۇلاۋدىڭ الدىندا تۇر. مەكتەپتىڭ بۇل جاق بولىگىن وقۋ ورنىنىڭ باسشىلىعى جابۋعا ءماجبۇر بولىپ وتىر.
كەزىندە نىسان كەشىكتىرىلىپ پايدالانۋعا بەرىلگەن: قۇرىلىس بارىسىندا كوپتەگەن كەمشىلىكتەر انىقتالىپ، ولاردى جويۋ قاجەت بولدى. ءبىر جىلدان كەيىن مەكتەپ پايدالانۋعا بەرىلدى، بىراق از عانا ۋاقىتتان كەيىن قابىرعالارىندا تەرەڭ جارىقتار پايدا بولا باستادى.
«مىنا قابىرعا قيسايىپ وتىرىپ قالدى. ول قۇلاپ قالا ما دەپ قورىقتىق. بۇل وتە قاۋىپتى. سوندىقتان ءوزىمىز قۇلايىن دەپ تۇرعان قابىرعانى تاقتايشالارمەن تىرەگەن بولدىق. ەندى ونى سۇرمەكشىمىز. ال مەردىگەر ءتىپتى كەلگەن دە جوق»، – دەپ ءتۇسىندىردى مەكتەپ ديرەكتورىنىڭ ورىنباسارى نۇرجامال ءادىلوۆا.
كەيىنگى كەزدە مەكتەپكە وقۋشىلاردىڭ اتا-انالارى ءجيى كەلەتىن بولدى. ولار مۇنداي جاعدايدا بالالار ءبىلىمنىڭ ورنىنا جاراقات الۋى ابدەن مۇمكىن دەپ قورقادى.
«بالالارىم وسى مەكتەپتە وقيدى. بەسىنشى بالام دا وقيىن دەپ وتىر. ارى قاراي قالاي بولارىنا ۋايىمداپ وتىرمىن. ەگەر ولار جوعارعى قاباتقا كوتەرىلگەن كەزدە قابىرعاسى كەنەتتەن وپىرىلىپ قۇلايتىن بولسا نە بولادى؟ ەلەستەتۋدىڭ ءوزى قورقىنىشتى»، – دەدى قالا تۇرعىنى زويا ەسبوسىنوۆا.
جارىقتار باسقا قابىرعالاردا دا پايدا بولا باستادى. مەكتەپ ديرەكتورى نىساندى قابىلداعان قۇرىلىس بولىمىنە دە، وبلىس باسشىلىعىنا دا ارىزدانعانىمەن، ناتيجە جوق. اعىمداعى جوندەۋ جۇمىستارىنا بيۋدجەتتەن بولىنگەن قارجىعا مۇعالىمدەر وسى قابىرعالاردى جاماپ-جاسقاۋعا ءماجبۇر.
«2017 جىلى سالىنعان مەكتەپ تەك بۇل عانا ەمەس، ورداباسى اۋدانىندا دا مەكتەپتەر سالىندى. وكىنىشكە قاراي، مۇنداي مەكتەپ سايرام اۋدانىندا، ماقتاارال، جەتىساي اۋداندارىندا دا بار. بۇل مەكتەپتەردى جوندەۋگە بىزدەن اقشا سۇرايدى، بىراق ولار جەتىسايدىڭ وزىندە ۇشەۋ بولسا، سارىاعاش پەن قازىعۇرتتا تاعى ءبىر-بىرەۋدەن وسىنداي مەكتەپتەر بار»، – دەدى. وبلىستىق ادامي الەۋەتتى دامىتۋ باسقارماسىنىڭ باسشىسى ءدىنيسلام بولاتحانۇلى.
بۇعان قوسا باسقارما جوسىقسىز قۇرىلىسشىلاردىڭ ءتىزىمىن جاساپ، ونى قۇقىق قورعاۋ ورگاندارىنا بەرۋدى جوسپارلاپ وتىرعاندارىن ايتتى. وبلىستىق ءبىلىم باسقارماسى نىسانداردى قابىلداعاندار دا جازالانۋعا ءتيىس دەپ ەسەپتەيدى. دەگەنمەن بۇل قۇرىلىسشىلاردىڭ قاتەلىكتەرىن ءوز بەتىمەن جويۋعا ءماجبۇر بولعان مۇعالىمدەرگە ەش كومەكتەسپەيدى.
“ادىرنا” ۇلتتىق پورتالى
