Türkıstan qalasyndaǧy Q.A.Iаsaui atyndaǧy HQTU-da Memleket basşysy Qasym-Jomart Toqaevtyŋ «Ädılettı qoǧamǧa – şynşyl söz» atty kıtabyn tanystyruǧa arnalǧan döŋgelek üstel öttı.
Jiynnyŋ maqsaty – Memleket basşysynyŋ qoǧamdyq-saiasi közqarastary men el damuynyŋ özektı baǧyttaryn qamtityn eŋbektıŋ mazmūnyn talqylau, kıtapta köterılgen mäselelerdıŋ qazırgı qoǧam üşın maŋyzyn saralau. Basqosuǧa ardagerler men memlekettık basqaru, bılım, ǧylym, mädeniet, qūqyq, jastar saiasaty jäne qoǧamdyq salanyŋ ökılderı, ziialy qauym, aqyn-jazuşylar, oqytuşylar men jas ǧalymdar qatysty.
Aita keteiık, «Ädılettı qoǧamǧa – şynşyl söz» – Prezidenttıŋ memleket, qoǧam jäne azamat turaly oilarynyŋ sabaqtastyǧyn körsetetın jinaq. Būl kıtapta Memleket basşysynyŋ 30 jyldan astam uaqyt ışınde qalyptasqan saiasi jäne azamattyq ūstanymdary, memleket basqaru täjıribesı, ūlttyq qūndylyqtar men qoǧam damuyna qatysty paiymdary jinaqtalǧan.
Jiyn moderatory, universitet rektor Janar Temırbekova öz sözınde: «Bügıngı basqosu – kıtapty köpşılıkke tanystyrumen ǧana şekteletın şara emes. Būl – elımızdıŋ bügını men bolaşaǧyna qatysty memlekettık ūstanymdardy, qoǧamdyq qūndylyqtardy jäne är azamattyŋ jauapkerşılıgın tereŋırek zerdeleuge mümkındık beretın maŋyzdy pıkır alaŋy. Aldaryŋyzdaǧy kıtapta Memleket basşysynyŋ täuelsızdıktıŋ alǧaşqy jyldarynan berı otandyq jäne halyqaralyq jiyndarda, qoǧamdyq kezdesulerde aitqan taŋdamaly sözderı, maqalalary men sūhbattarynda, sondai-aq eŋbekterınde körınıs tapqan oi-tūjyrymdary jinaqtalǧan. Otyz bes jylǧa juyq kezeŋdı qamtityn būl materialdar Prezidenttıŋ memleketşıldık ūstanymyn, saiasi täjıribesın jäne el damuyna qatysty közqarasynyŋ qalyptasu jolyn tanytady», - dedı.
Türkıstan oblystyq ardagerler keŋesınıŋ Töraǧasy Jeŋısbek Mäulenqūlov: «Keibır kıtap adamǧa aqparat berse, keibırı bılım beredı. Endı bırı adamnyŋ oilau baǧytyn aiqyndap, qoǧamnyŋ qaida bet aluy kerek ekenı jönınde baǧdar beredı. Prezidentımız «Ädılettı qoǧamǧa – şynşyl söz» kıtabynda joǧaryda aityp ötken üş baǧytty da berıp otyr. Kıtapta bırtūtas memleketşıldık pen dünietanym jatyr. Kıtaptyŋ özı 21 taqyrypqa bölıngen. Är bölımde ädılettı, quatty, jauapkerşılıgı joǧary Qazaqstandy qalyptastyru ideiasy jan-jaqty qarastyrylǧan»,-dedı.
Döŋgelek üstelde Filologiia ǧylymdarynyŋ kandidaty, professor, Bekjıgıt Serdälı «Ūlt sapasy, memlekettık basqaru, ǧylym men bılım, mädeniet jäne ruhaniiat turaly paiymdar» taqyrybynda, al Oblystyq jastar resurstyq ortalyǧynyŋ bölım basşysy Nariman Marhabaev «Jastarǧa arnalǧan oilar: bılım, eŋbek, jauapkerşılık jäne bolaşaq» jönınde baiandama oqydy. «Ädılet» partiiasy janyndaǧy Jastar qanaty Türkıstan oblystyq filialynyŋ töraǧasy Erkebūlan Madiiarūly da özınıŋ ötkır oiyn ortaǧa saldy. Jiyn soŋynda qatysuşylar kıtapta qamtylǧan oi-tūjyrymdardyŋ bügıngı qoǧam üşın özektı ekenın atap öttı.
