تۇركىستان وبلىسى سارىاعاش اۋدانى جىبەك جولى اۋىلىندا «11-سىنىپ وقۋشىسى 14 جاستاعى قىزدى زورلاماق بولىپ، قورقىتتى» دەگەن اقپارات تاراعاننان كەيىن تۇرعىندار اراسىندا تارتىپسىزدىك ورىن الدى. بۇل تۋرالى ازاتتىق راديوسى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، وقيعا 14 شىلدە كۇنى ورىن العان.
«اۋىل تۇرعىندارىن ءدۇر سىلكىندىرگەن وقيعا 14 شىلدە كۇنى تۇنگى 12:00دەن كەيىن بولدى. الەۋمەتتىك جەلىلەردە «11-سىنىپ وقۋشىسى 14 جاستاعى قىزدى زورلاماق بولىپ، قورقىتتى» دەگەن اقپارات تاراعاننان كەيىن كۇدىكتى ءجاسوسپىرىم تۇراتىن ءۇيدىڭ ماڭىنا اشۋلى جۇرت جينالدى»، - دەلىنگەن حابارلامادا.
ايتۋلارىنشا، اۋىلعا كىرە بەرىس جولدى اۆتوماتپەن قارۋلانعان پوليتسيا قىزمەتكەرلەرى كۇزەتەدى. ءار بۇرىشتا پوليتسيا كولىكتەرى مەن اۆتوبۋستار، سىنعان تەرەزەلەر بار.
تۇرعىنداردىڭ ايتۋىنشا، اۋىلدا بىرنەشە كۇننەن بەرى ينتەرنەت بايلانىسى جۇمىس ىستەمەي تۇرعان. بايلانىستىڭ قالپىنا كەلتىرىلگەنىنە ءبىر كۇن بولدى.
جۇما كۇنگى تارتىپسىزدىك كەزىندە زارداپ شەكتى دەگەن ۇيلەردىڭ ءبىرىنىڭ جانىندا ارنايى تەحنيكاسى بار شاعىن اۆتوبۋس بولعان.
مالىمەتتەرگە قاراعاندا، جينالعاندار ءۇي ماڭىنداعى كولىكتەرگە تاس لاقتىرىپ، تەرەزەلەرىن سىندىرعان.
اۋىل تۇرعىندارى وقيعا سالدارىنان بىرنەشە ادام زارداپ شەككەنىن ايتادى: بىرەۋىنىڭ اياعى سىنعان، بىرەۋىنىڭ مۇرىن سۇيەكتەرى زاقىمدالعان. ال اۋىل اكىمدىگى زارداپ شەككەندەر جوق دەپ سەندىرەدى.
«الەۋمەتتىك جەلىلەردە وقيعانىڭ جىبەك جولى اۋىلىندا بولعانى جازىلعان بەينەروليك تارادى. وسى بەينەلەردىڭ بىرىندە جابىق اۋلادا بىرنەشە ەر ادامنىڭ ورىندىقتاردى الىپ، بىرنەشە باسقا ەر ادامدارعا قاراي لاقتىرىپ جاتقانى كورسەتىلگەن. ۆيدەو پوليتسەيلەر اۋىلعا كەلگەنگە دەيىن تۇسىرىلگەنگە ۇقسايدى»، - دەلىنگەن حابارلامادا.
تاعى ءبىر ۆيدەودا پوليتسيا جانە تارتىپسىزدىككە قارسى قۇرال كيگەن ەر ادامداردىڭ كوشەدە ايعايلاپ جاتقان ادامداردى تاراتۋعا تىرىسقانى كورسەتىلگەن. ازاماتتىق كيىم كيگەن ەر ادامنىڭ جەيدەسى جىرتىلىپ، ونىڭ ۇستىندە قانعا ۇقساس ۇلكەن قىزىل داق بار ەكەنى اتاپ وتىلگەن.
تۇرعىنداردىڭ ايتۋىنشا، وقيعا بولعان ءتۇنى جۇزدەگەن ادام كوشەگە شىققان. الايدا اۋىل اكىمدىگى 50-گە جۋىق ادام بولعانىن ايتادى.
«بىرنەشە ساعاتتان كەيىن اۋىلعا پوليتسيا قىزمەتكەرلەرى كەلىپ، اشۋلى حالىقتى تاراتتى. پوليتسيا بەكەتتەرى ورناتىلىپ، ينتەرنەت ءوشىرىلدى»، - دەلىنگەن حابارلامادا.
وسى وقيعادان كەيىن سارىاعاش اۋداندىق سوتىنىڭ مالىمەتىنشە، 16 جاستاعى ءجاسوسپىرىم «زورلاۋ» جانە «قىلمىس جاساۋعا وقتالۋ» كۇدىكتەرىمەن ۇستالدى. سونىمەن قاتار، 19 جاستاعى جاس جىگىت «بۇزاقىلىق جاسادى» دەگەن ايىپپەن ۇستالدى. سوت ولاردى ون تاۋلىككە قاماۋعا الۋعا شەشىم قابىلدادى.
مالىمەتتەرگە سايكەس، 16 جاستاعى ءجاسوسپىرىم 14 جاستاعى قىزدى ەركىنەن تىس شاقىرىپ، قولىنان تارتىپ، قىز ونىمەن كەزدەسۋدەن باس تارتقان كەزدە ول قورقىتا باستاعان. 14 شىلدەگە قاراعان ءتۇنى بولعان وقيعاعا وسى سەبەپ بولعان دەپ حابارلاندى.
«جۇما كۇنى ازاتتىق راديوسىنىڭ ءتىلشىسى «ۇيىنە شابۋىل جاسالعان» وتباسى مۇشەلەرىمەن سويلەسۋگە ارەكەتتەندى، بىراق ولار ءوز قاۋىپسىزدىگى ءۇشىن قورقاتىندارىن ايتىپ، سۇحبات بەرۋدەن باس تارتتى. وتباسى قازاقستانداعى ءازىربايجان ەلشىلىگىنە حابارلاسىپ، باسقا جەرگە قونىستاندىرۋدى سۇراعان. اۋلاسىن تاسپەن اتقىلاعان ەكىنشى ءۇيدىڭ تۇرعىندارى دا سۇحبات بەرۋدەن باس تارتتى»، - دەپ قورىتىندىلادى حابارلاما.
وبلىستىق پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، تۇركىستان وبلىسى سارىاعاش اۋدانىندا بولعان وقيعادان كەيىن پوليتسەيلەر قىلمىستىق ءىس قوزعاعان.
«بۇل فاكتى بويىنشا قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى»، - دەلىنگەن حابارلامادا.
تۇركىستان وبلىسى سارىاعاش اۋدانىنداعى اۋىلداردىڭ بىرىندە جاسالعان بۇزاقىلىق فاكتىسى بويىنشا قۇقىق قورعاۋ ورگاندارى تەرگەۋ جۇرگىزىپ جاتقانى حابارلاندى.
«بارلىق ءمان-جايدى انىقتاۋ ءۇشىن تەرگەۋ ءجۇرىپ جاتىر. اۋىلداعى جاعداي تۇراقتى. جەرگىلىكتى تۇرعىندارعا ءتۇسىندىرۋ جۇمىستارى جۇرگىزىلدى»، - دەلىنگەن حابارلامادا.
