الماتى وبلىسىندا ونەركاسىپ ءوندىرىسى 108,7% ءوسىم كورسەتىپ، ونىڭ 90%-ى وڭدەۋ سەكتورىندا قالىپتاسقان.
مارات سۇلتانعازيەۆتىڭ مالىمەتىنشە، بيىلعى 10 ايدا ونەركاسىپ كولەمى 2,1 ترلن تەڭگەگە جەتتى. وبلىس اگرارلىق ايماقتان يننوۆاتسيالىق تەحنولوگيالار مەن وڭدەۋ ونەركاسىبىنىڭ جەتەكشى ورتالىعىنا اينالا باستاعان.
«وڭىرلىك ءونىمنىڭ ۇشتەن ءبىرى ونەركاسىپ سالاسىنا تيەسىلى بولعاندىقتان، بۇل سالا ينۆەستيتسيا تارتۋدىڭ نەگىزگى كوزى بولىپ ەسەپتەلەدى. سول سەبەپتى نەگىزگى كاپيتالعا ينۆەستيتسيا تارتۋ ءبىزدىڭ باستى باسىمدىعىمىزدىڭ بىرىنە اينالدى»، - دەدى ءوڭىر اكىمى ورتالىق كوممۋنيكاتسيالار قىزمەتىندە وتكەن بريفينگ كەزىندە.
2022 جىلى نەگىزگى كاپيتالعا ينۆەستيتسيالار كولەمى 614 ملرد تەڭگە بولسا، 2024 جىلى بۇل كورسەتكىش 1 ترلن تەڭگەگە دەيىن ءوستى. جىل سوڭىنا دەيىن 1,3 ترلن تەڭگە كولەمىندە جوسپارلانىپ وتىر.
ىسكە قوسىلعان ءىرى جوبالاردىڭ ىشىندە «Focus Logistics» ءىرى لوگيستيكالىق پاركى (70 ملرد تەڭگە), «التىن تاعا» بەتون ونىمدەرى زاۋىتى (35 ملرد تەڭگە), «LC Waikiki» كوتەرمە-ساۋدا ورتالىعى (30 ملرد تەڭگە), «شين-لاين» بالمۇزداق فابريكاسى (18 ملرد تەڭگە), «قاپشاعاي بيداي ونىمدەرى» ءداندى جانە مايلى داقىلداردى تەرەڭ وڭدەيتىن اگروكەشەنى (12 ملرد تەڭگە), «كەگەنمياسپروم» ەت كومبيناتى (3,5 ملرد تەڭگە).
تاماق ونەركاسىبى سالاسىندا «Galanz Bottlers» كومپانياسىن كەڭەيتۋ (17,8 ملرد. تەڭگە), «QAZAQ GLOBAL FOOD JV» (16,5 ملرد. تەڭگە), «پريما قۇس» (14 ملرد. تەڭگە). بۇل كومپانيالار ەكسپورتقا باعىتتالعان ءونىم وندىرەدى.
