تۇركىستان مۋزىكالىق-دراما تەاترىنىڭ ارتىستەرى گرۋزيا ەلىنىڭ ارنايى شاقىرتۋىمەن باتۋمي قالاسىندا گاسترولدىك ساپارمەن ونەر كورسەتۋدە.
الىستان ات ارىلتىپ بارعان جاس ونەر ۇجىمى يليا چاۆچاۆادزە اتىنداعى مەملەكەتتىك كاسىبي دراما تەاترىنىڭ ساحناسىندا اقىن، فيلوسوف اباي قۇنانبايۇلىنىڭ «قارا سوزدەرى» نەگىزىندە ساحنالانعان «اباي. قارا ءسوز» پلاستيكالىق سپەكتاكلىن كورەرمەن نازارىنا ۇسىندى. قويىلىمنىڭ العاشقى كورسەتىلىمىنە تۇركىستان وبلىسى اكىمىنىڭ ورىنباسارى ەرتاي التاەۆ، قازاقستان رەسپۋبليكاسىنىڭ باتۋمي قالاسىنداعى قۇرمەتتى كونسۋلى گيورگي اباشيدزە، قازاقستان رەسپۋبليكاسىنىڭ گرۋزياداعى ەلشىلىگىنىڭ ءۇشىنشى حاتشىسى ريزا سادىق، گرۋزيانىڭ مادەنيەت مينيسترلىگىنىڭ مادەنيەت دەپارتامەنتىنىڭ باسشىسى نينو لوسابەريدزە، يليا چاۆچاۆادزە اتىنداعى باتۋمي مەملەكەتتىك دراما تەاترىنىڭ ديرەكتورى كوتە مزاۆيا جانە مادەنيەت سالاسىنىڭ وكىلدەرى قاتىستى.
تۇركىستان وبلىسى اكىمىنىڭ ورىنباسارى ەرتاي كەنجەبەكۇلى قازاقستان مەن گرۋزيا اراسىنداعى عاسىرلار بويى جالعاسىپ كەلە جاتقان رۋحاني ىنتىماقتاستىق پەن دوستىقتىڭ ماڭىزىن اتاپ ءوتىپ، گرۋزيا حالقىنىڭ قازاق ونەرىنە جاساعان زور قۇرمەتىنە العىس ءبىلدىردى.
گرۋزيالىق كورەرمەندەر تۇركىستاندىق تەاتر ارتىستەرىنىڭ ساحنالاعان قويىلىمداردى ەرەكشە ىلتيپاتپەن قابىلداپ، ءتانتى بولدى. ارتىستەردىڭ شەبەرلىكتەرىنە، مادەنيەت پەن ونەر سالاسىن دامىتۋداعى بەلسەندى ەڭبەكتەرىنە جوعارى باعالارىن بەرىپ، ريزاشىلىقتارىن جەتكىزدى.
اباي قۇنانبايۇلىنىڭ «قارا ءسوزى» – ۋاقىتتىڭ سىنىنان وتكەن، عاسىرلار وتسە دە ماڭىزى ازايماعان، ادام ءومىرىنىڭ ءمانى مەن ماقساتتارىن تەرەڭ ءارى جان-جاقتى زەرتتەۋگە ارنالعان وي-تولعامدار جيناعى. اقىننىڭ شىعارماسىنا نەگىزدەلگەن «قاراسوز» پلاستيكالىق سپەكتاكلى دە ادامزاتتىڭ ءمان-ماعىناسىنا تەرەڭ بويلاۋعا شاقىرادى. سپەكتاكلدىڭ پلاستيكالىق ءتىلى ابايدىڭ سوزبەن جەتكىزگەن تەرەڭ فيلوسوفياسىن ادام دەنەسىنىڭ قوزعالىسى، سەزىم مەن ىشكى ارپالىس ارقىلى جاڭاشا سويلەتەدى. ساحناداعى ءاربىر قيمىل – ادام بالاسىنىڭ ءومىردىڭ ءمانىن ىزدەپ الاسۇرعان ساتتەرىن، رۋحاني قۇلدىراۋى مەن قايتا ورلەۋىن كورەرمەننىڭ جۇرەگىنە تىكەلەي جەتكىزەتىن قۇرالعا اينالادى. وسىلايشا سپەكتاكل ۇلى ويشىلدىڭ تاعىلىمدى ويلارىن وزگەشە ساحنالىق تىلمەن جەتكىزىپ، اباي دانالىعىن جاڭا قىرىنان تانىتۋدى ماقسات ەتەدى.
سپەكتاكلدىڭ رەجيسسەرى – مادينا مۇراتپەكوۆا، كومپوزيتورى – حاميت شانعاليەۆ.
ايتا كەتسەك، گاسترول اياسىندا 3 قىركۇيەك كۇنى «اباي. قارا ءسوز» سپەكتاكلىنىڭ ەكىنشى كورسەتىلىمى وتەدى. بەس كۇندىك گاسترول – تەك ونەر كورسەتۋ ەمەس، ەكى ەل اراسىنداعى دوستىق پەن ىنتىماقتاستىقتى ودان ءارى نىعايتىپ، مادەنيەت پەن رۋحانيات سالاسىن دامىتۋعا باعىتتالعان.
