شىعىس قازاقستان وبلىسىنىڭ ريددەر قالاسىندا 600 وقۋشىعا ارنالعان جاڭا قازاق مەكتەبى پايدالانۋعا بەرىلدى، دەپ حابارلايدى "ادىرنا" ءتىلشىسى.
ءبىلىم ورداسىنىڭ اشىلۋ سالتاناتىنا وبلىس اكىمى نۇرىمبەت ساقتاعانوۆ قاتىستى.
«بيىل وبلىسىمىزدا 10 مىڭعا جۋىق جاس ءبۇلدىرشىن مەكتەپ تابالدىرىعىن العاش اتتاپ وتىر. ونىڭ 60-تان استامى وسى شاڭىراق مەكتەبىنە قابىلداندى. جاڭا وقۋ جىلىندا شەكارالىق ايماق سانالاتىن مارقاكول اۋدانى، جاڭادان قۇرىلعان سامار اۋدانى جانە ءوندىرىسى قۋاتتى ريددەر قالاسىندا ءۇش جاڭا مەكتەپ پايدالانۋعا بەرىلدى. 600 ورىندىق زاماناۋي «شاڭىراق» مەكتەپ-گيمنازياسى – كەلەشەكتە ءبىلىم مەن يننوۆاتسيانىڭ كوشىن باستاپ، ەلىمىزدىڭ ءبىلىمدى، باسەكەگە قابىلەتتى جاستارىن تاربيەلەيتىن ىرگەلى ءبىلىم ورداسىنا اينالسىن. جاڭا وقۋ جىلى قۇتتى بولسىن!»، – دەدى ايماق باسشىسى.
جاڭا مەكتەپ – قالاداعى جالعىز قازاق مەكتەبى سانالاتىن «شاڭىراق» ءبىلىم ورداسىنىڭ 35 جىلدان بەرى شەشىمىن كۇتكەن ماسەلەسىنىڭ ناتيجەسى. بۇعان دەيىن مەكتەپتىڭ ەسكى عيماراتىنىڭ جاعدايى، وقۋ ورىندارىنىڭ تارلىعى جانە وقۋشىلاردىڭ ەكى كورپۋسقا ءبولىنىپ ءبىلىم الۋى اتا-انالار تاراپىنان كوتەرىلگەن.
ماسەلە ريددەرگە بارعان ساپارىندا اتا-انالارمەن كەزدەسكەن بۇرىنعى وبلىس اكىمى ەرمەك كوشەرباەۆقا دا ايتىلعان. كەيىن ونىڭ «كازتسينك» كومپانياسىنىڭ باسشىلىعىمەن جۇرگىزگەن كەلىسسوزدەرى ناتيجەسىندە كاسىپورىن جاڭا مەكتەپتىڭ قۇرىلىسىن تولىق قارجىلاندىرۋعا كەلىسكەن.
قازىر وقۋشىلار زاماناۋي تالاپتارعا ساي جاڭا عيماراتتا ءبىلىم الادى.
